Almaniyanın Bilefeld şəhərində silahlı hücum olub, xəsarət alanlar var
Berlin, 27 fevral, AZƏRTAC
Almaniyanın Şimali Reyn-Vestfaliya əyalətinin Bilefeld şəhərində məhkəmə binasının qarşısında silahlı hücum törədilib.
AZƏRTAC “Bild” qəzetinə istinadla xəbər verir ki, naməlum şəxs boksçu Besar Nimaninin qətlə yetirilməsi ilə bağlı cinayət işi üzrə məhkəmə prosesinin başa çatmasından sonra binadan çıxan insanlara odlu silahdan bir neçə dəfə atəş açıb. Sonra həmin şəxs avtomobillə hadisə yerindən uzaqlaşıb.
Hadisə nəticəsində bir neçə nəfər xəsarət alıb. Xəsarət alanlar arasında təqsirləndirilən şəxslərdən birinin atasının və qardaşının da olduğu bildirilir. Hücumla əlaqədar hadisə yerinə polis və xüsusi təyinatlı qüvvələr, helikopter cəlb olunub. Hadisəni törətməkdə şübhəli bilinən şəxslərdən biri saxlanılıb.
Qeyd edək ki, Hüseyn Akkurt və Ayman Davud Kirit adlı iki şəxs ötən ilin martında Bielefeld şəhərinin mərkəzində boksçu Besar Nimanini odlu silahla qətlə yetirməkdə ittiham olunurlar.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
