Almaniyanın Brandenburq əyalətində koalisiya hökuməti fəaliyyətini dayandırıb
Berlin, 6 yanvar, AZƏRTAC
Almaniyanın Brandenburq əyalətində Sosial Demokrat Partiyası (SPD) ilə Sahra Vaqenknext İttifaqı (BSW) arasında qurulmuş koalisiya hökuməti fəaliyyətini dayandırıb.
AZƏRTAC xəbər verir ki, bu barədə əyalətin Baş naziri Ditmar Voydke Potsdamda keçirdiyi mətbuat konfransında məlumat verib.
O, koalisiyanın davam etməsi üçün zəruri siyasi əsasın artıq mövcud olmadığını bildirib. Koalisiya BSW-dən olan üç deputatın əyalət parlamentindən ayrılmasından sonra çoxluğunu itirib. Baş nazirin sözlərinə görə, bir ildən artıq fəaliyyət dövründə bir sıra vacib qərarlar, o cümlədən dayanıqlı əyalət büdcəsi qəbul edilsə də, əməkdaşlıq BSW daxilindəki daimi daxili çəkişmələr səbəbindən çətinləşib.
“BSW artıq koalisiyaya aydın və açıq şəkildə sadiqlik nümayiş etdirmirdi”, - deyə D.Voydke vurğulayıb.
Baş nazir Brandenburq əyalətinin idarə olunması üçün imkanların qorunduğunu və hazırkı nazirlərin hələlik vəzifələrində qalacaqlarını qeyd edib.
Brandenburqdakı SPD-BSW koalisiyası Almaniyada bu iki siyasi qüvvə arasında yeganə hökumət əməkdaşlığı idi.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
