Almaniyanın Türingen əyalətində kəndə ildırım düşməsi nəticəsində bir neçə ev yanıb
Berlin, 6 sentyabr, AZƏRTAC
Almaniyanın Türingen əyalətindəki Droqnits kəndinə ildırımın düşməsi bir neçə evin yanması ilə nəticələnib.
AZƏRTAC “Bild” qəzetinə istinadla xəbər verir ki, gecəyarısı baş verən hadisə zamanı ildırım kəndin mərkəzindəki təsərrüfat tikililərindən birinə düşərək yanğına səbəb olub. Yanğın sonradan yaxınlıqdakı evlərə keçib.
Türingen polisinin açıqlamasında üç evin, bir neçə təsərrüfat tikilisi və anbarının tamamilə yandığı bildirilib. Ümumilikdə 18 nəfər, o cümlədən azyaşlı və yaşlı sakinlər evsiz qalıb. Zərərçəkənlər müvəqqəti olaraq digər sakinlərin evlərinə sığınıblar.
Yanğının söndürülməsinə 150-yə yaxın xilasedici cəlb edilib. Əməliyyat zamanı iki yanğınsöndürən də xəsarət alıb.
Yerli hakimiyyət orqanları zərərçəkənlər üçün yardım kampaniyası elan edib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
