AMEA prezidenti: Qərbi Azərbaycan toponimlərinin saxtalaşdırılması araşdırılır
Bakı, 3 iyun, AZƏRTAC
Qərbi Azərbaycana qayıdış çağırışına ölkəmizdə ilk səs verən qurumlardan biri də Azərbaycan Milli Elmlər Akademiyası (AMEA) olub. 2024-cü ilin dekabr ayının sonunda, yəni bu ideyanın səsləndiyi vaxtdan cəmi bir həftə keçməmiş Azərbaycan Milli Elmlər Akademiyasının Rəyasət Heyətinin qərarı ilə Qərbi Azərbaycan məsələlərini tədqiq edib öyrənmək üçün Akademiyanın müxtəlif strukturlarında "Qərbi Azərbaycan tarixi", "Qərbi Azərbaycan folkloru", "Qərbi Azərbaycan toponimiyası" və "Qərbi Azərbaycanla bağlı əlyazmaların tədqiqi" adlı şöbələr fəaliyyətə başlayıb.
AZƏRTAC xəbər verir ki, bunu AMEA-nın prezidenti akademik İsa Həbibbəyli Bakı Dövlət Universiteti (BDU) və Qərbi Azərbaycan İcmasının (QAİ) birgə təşkilatçılığı ilə keçirilən “Qərbi Azərbaycana qayıdış: milli ideyanın yeni mərhələsi kimi” mövzusunda I beynəlxalq elmi konfransda deyib.
O bildirib ki, son vaxtlarda Qərbi Azərbaycan İcmasında Qərbi Azərbaycanla bağlı kitabxananın yaradılmasına akademiya tərəfindən diqqət ayrılır: “Artıq Akademiyanın bir neçə institutu Qərbi Azərbaycan İcmasındakı kitabxananın zənginləşməsinə öz köməyini göstərib. Ümumiləşmiş şəkildə artıq Azərbaycan Milli Elmlər Akademiyasında Qərbi Azərbaycanla əlaqədar olaraq kiçik bir kitabxana həcmində kitablar, məqalələr yazılıb. Yaxşı cəhətlərdən biri də odur ki, həmin kitabların, xüsusən məqalələrin böyük əksəriyyəti həm də xarici ölkələrdə, müxtəlif dillərdə çap olunub. Bunun Qərbi Azərbaycan həqiqətlərinin dünyaya yayılmasında özünəməxsus rolu vardır. Prezident İlham Əliyev Qərbi Azərbaycanla bağlı tədqiqatların aparılmasının əhəmiyyətini bir daha cəmiyyətin diqqət mərkəzinə çəkib”.
İsa Həbibbəyli qeyd edib ki, xüsusən Qərbi Azərbaycan toponimlərinin öyrənilməsinə diqqət artırılıb: “Azərbaycan alimləri müəyyən ediblər ki, Ermənistan Respublikasının Ali Soveti sovet hakimiyyəti illərində, lap bu günlərə - 2018-ci ilə qədər Qərbi Azərbaycanla bağlı toponimlərlə bağlı Ermənistan dövlətinin rəsmi qurumları, ali dövlət qurumları qərar verilərək Azərbaycan toponimlərini saxta yolla, süni yolla dəyişdiriblər. Belə toponimlərin sayı 600-dən çoxdur. Bu toponimlərin bərpa olunması, onların Azərbaycan mənşəyinin izah olunması, bu barədə tədqiqatların aparılması da diqqət mərkəzindədir. Artıq bu istiqamətdə bir neçə kitab çap olunub. Qərbi Azərbaycanla bağlı xəritələr üzərində tarixin üsubatı iş aparır. Mən elə bilirəm ki, alimlərimizin dəqiqləşdirdiyi, Azərbaycan varlığını isbat eləyən xəritələri də Azərbaycan cəmiyyəti yaxın vaxtlarda ala biləcək. Ümumiyyətlə, Qərbi Azərbaycana qayıdış ideyası Azərbaycanın minillik tarixində və müstəqil Azərbaycan dövlətinin indiki siyasi-ideoloji mühitində Prezident İlham Əliyevin adı ilə bağlı olan və Azərbaycanın bütövlüyü ideyasını ifadə eləyən tarixi bir konsepsiyadır. Bu yeganə konsepsiyadır ki, ərazi iddiası olmayan bütövlük konsepsiyasıdır. Bu qayıdış konsepsiyası, eyni zamanda, barış konsepsiyasıdır. İnanırıq ki, yaxın günlərdə İrəvanda ədalət qalib gələcək, Qərbi Azərbaycana qayıdışla Ermənistan Azərbaycanla barışda da öz yerini tapacaq”.
Bölmənin digər xəbərləri
