AMERİKA SENTİNİN XARİCİ GÖRKƏMİ DƏYİŞİR
AZƏRTAC Rusiya informasiya agentliklərinə istinadla xəbər verir ki, Amerika Birləşmiş Ştatlarının ən xırda pulunun - bəzən britaniyasayağı “penni” adlandırılan bir sentlik sikkənin xarici görkəmi son yarım əsrdə ilk dəfə dəyişəcəkdir.
Sentin üz tərəfi dəyişməyəcək: orada ABŞ-ın 16-cı prezidenti Avraam Linkolnun portreti təsvir edilmişdir. Sikkənin arxa tərəfi isə gələn ildən başlayaraq dörd müxtəlif variantda zərb ediləcəkdir. Bu yenilik Avraam Linkolnun 2009-cu ildə qeyd ediləcək 200 illik yubileyinə həsr edilmşdir.
Yubiley komissiyası və Amerika Birləşmiş Ştatlarının sikkəxanası bir sentlik xırda pulun reversi üçün yeni təsvir yaradılmasına dair müsabiqəyə yekun vurmuşdur. Müsabiqənin qalibi hesab edilmiş işlərin müəllifləri sikkəxananın nəqqaşlarıdır. Ən yaxşı miniatürləri isə ölkənin maliyyə naziri Henri Polson şəxsən özü seçmişdir.
Sikkənin reversinin layihələrində ABŞ-ın 16-cı prezidentinin həyat yolunun əsas mərhələləri əks etdirilmişdir. Məsələn, tirlərdən tikilmiş daxma təsviri Linkolnun Kentukki Ştatında keçmiş uşaqlıq illərinin rəmzidir. Reversin növbəti variantında Avraam Linkoln nahar fasiləsi zamanı əynində iş paltarı, əlində kitab təsvir edilmişdir. Bu variant onun İndiana Ştatında keçmiş gənclik dövrünə işarədir. Sonra İllinoys dövrü - Linkolnun siyasi karyerasının başlanğıc mərhələsi təsvir edilir: o, Springfilddə Kapitolinin köhnə binasının pilləkənində dayanmışdır. Nəhayət, sonuncu variant Vaşinqtona, Linkolnun prezidentlik dövrünə aiddir. Bu variantda Amerika Birləşmiş Ştatları konqresinin hələ tam tikilməmiş günbəzinin təsvir edilməsi vətəndaş müharibəsi dövründə ölkənin parçalanmasına işarə olacaqdır.
PRAYM-TASS agentliyi qeyd edir ki, Avraam Linkolnun 1863-cü ildə ABŞ-da quldarlığı ləğv etmiş xilaskar prezident kimi xidmətləri sentin yeni qrafik həllərində öz əksini tapmamışdır.
Xatırladaq ki, Amerika Birləşmiş Ştatlarının bir sentlik sikkələrinin dizaynı axırıncı dəfə 1959-cu ildə Avraam Linkolnun əvvəlki yubileyi münasibətilə dəyişmişdi. O vaxtdan bəri sentin arxa tərəfində Avraam Linkolnun şərəfinə Vaşinqtonun mərkəzində ucaldılmış xatırə kompleksi təsvir edilirdi.
