Ankarada narkotik alverində şübhəli bilinən 525 şəxs saxlanılıb
Ankara, 17 aprel, AZƏRTAC
Türkiyənin daxili işlər naziri Ali Yerlikaya narkotik vasitələrin satışı və yayılması ilə məşğul olan şəxslərə qarşı növbəti genişmiqyaslı əməliyyatın başladığını açıqlayıb.
AZƏRTAC xəbər verir ki, altı ay ərzində hazırlıq işləri aparılan “Narkokapkan-Ankara” kod adlı əməliyyat çərçivəsində paytaxt bölgəsində ümumilikdə 525 şübhəli saxlanılıb.
Nazirin sözlərinə görə, əməliyyatın əsas məqsədi gənclər arasında narkotik vasitələrin yayılmasının qarşısını almaq olub. O əlavə edib: “Ankara vilayətində 626 müxtəlif ünvanda həbslər aprelin 17-də səhər tezdən başlayıb. Əməliyyat Türkiyə Cümhuriyyəti tarixində ən genişmiqyaslı tədbir olub. Bu əməliyyatda 4768 polis əməkdaşı və 40 xidməti iti olan kinoloq briqadası iştirak edib. Həmçinin 4 ədəd PUA-dan istifadə edilib”.
Hüquq-mühafizə orqanlarının bütün hərəkətləri prokurorluq orqanları ilə razılaşdırılıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
