“Apple” 2014-cü ildə kapital xərclərinin həcmini artıracaqdır
Bakı, 1 noyabr (AZƏRTAC). “Apple” şirkəti istehsalat avadanlıqlarının alınması, məhsulların testləşdirilməsi və pərakəndə satış dükanları üçün nəzərdə tutulmuş xərcləri 2014-cü ildə 57 faiz artırmaq niyyətindədir.
Analitiklər hesab edirlər ki, önəmli xərclər internetə qoşulan “Apple TV” televizorunun və “iWatch” smart-saatlarının buraxılması ilə bağlıdır.
Şirkət bildirmişdir ki, “Apple” şirkətinin kapital xərcləri cari maliyyə ilində ötən ildəki 7 milyard dollara qarşı 11 milyard dollaradək artacaqdır. Şirkətin ümumi strukturundan 550 milyona yaxın vəsait pərakəndə əməliyyatlarla bağlı olacaqdır. “Apple” 30-a yaxın yeni pərakəndə dükan açmaq və öncə açılan 20 dükanı yenidən qurmaq niyyətindədir.
Daha yüksək xərclər “Apple” şirkətinin yeni “iPhone” və “iPad Air” modellərinin satışlarından əmin olduğuna işarə edir.
Analitiklərin rəyinə əsasən, 2014-cü ilin sentyabrında başa çatan cari maliyyə ilində, “Apple” şirkətinin satışları 6-9 faiz arta bilər və hazırkı 171 milyarda qarşı 184 milyard dollar təşkil edə bilər.
Bundan başqa, şirkətin hesabatında bildirilir ki, şirkətin işçilərinin sayı 80 min 300 nəfər təşkil edir və onların demək olar ki, 43 mini pərakəndə satış sahəsində işləyirlər. Bir il öncə “Apple” şirkətinin ştat cədvəlində 72 min 800 nəfər qeydə alınmışdır.
Bölmənin digər xəbərləri
