Argentinada 8200 il əvvələ aid qədim mağara rəsmləri aşkar edilib
Bakı, 9 mart, AZƏRTAC
Arxeoloqlar Argentina Pataqoniyasında 8200 il əvvələ aid Cənubi Amerikanın qədim mağara rəsmlərini aşkar ediblər.
AZƏRTAC “Reuters” agentliyinə istinadla xəbər verir ki, 895 rəsm Argentina və Çili arxeoloqları tərəfindən paytaxt Buenos-Ayresdən təxminən 1100 kilometr cənub-qərbdə, Neuquen əyalətində yerləşən 630 kvadratmetrlik qaya sığınacağı olan “Huenul 1” mağarasında tapılıb.
"Science Advances" jurnalında dərc olunan araşdırmanın müəllifi Quadalupe Romero Villanueva tapıntı ilə bağlı deyib: “Biz kömürlə çəkilmiş dörd qara alət formasının tarixini təyin edə bildik. Bunlar Cənubi Amerikadakı mağara rəsmlərinin ən qədim olduğunu sübut etdi”.
Argentinalı arxeoloq bildirib ki, bu kəşf Huenul mağarasında rəsm sənətinin təxminən 8000 il əvvəl başladığını və burada görülən xüsusi nümunənin rənglənməsi təcrübəsinin ən azı 3000 il müddətində davam etdiyini göstərir.
Kəşf təxminən 7000-5000 il əvvəl orta Holosen dövründə bölgədə məskunlaşan ovçu-toplayıcı icmaların bədii qabiliyyətinə və mədəni irsinə dair sübutlar təqdim edir və iqlimə sosial-ekoloji dayanıqlığı göstərir, həmçinin əraziyə səpələnmiş əhali arasında ünsiyyət vasitələrini nümayiş etdirir.
Quadalupe Romero Villanueva deyib: “Biz inanırıq ki, həmin görüntülər xüsusilə bu mağaranı və Pataqoniyanın şimalındakı səhra mühitini zəbt etmiş mobil ovçu-toplayıcı qrupların orta Holosen dövründə baş verən həddindən artıq quraqlıq dövrünün iqlim probleminə davamlı cavabının bir hissəsidir”.
Arxeoloq, həmçinin Cənubi Amerikada daha qədim mağara rəsmlərinin ola biləcəyini deyib. O əlavə edib ki, qədim mağara rəsmləri Argentinanın 9500 il əvvələ aid Cueva de las Manos məkanında olduğu kimi, nisbi tarixə malik olacaqlar.
Bölmənin digər xəbərləri
