ARXANGELSK VİLAYƏTİNDƏ YAŞAYAN AZƏRBAYCANLILARIN PROBLEMLƏRİNİN ARADAN QALDIRILMASI YOLLARI MÜZAKİRƏ OLUNMUŞDUR
Səfər çərçivəsində baş konsul Arxangelsk vilayət administrasiyasının başçısı vəzifəsini icra edən Vladimir Voykovla, Rusiya Prezidentinin vilayət üzrə federal inspektoru Aleksey Yermakovla, vilayət parlamentinin sədri Vitali Fortıgin ilə görüşmüşdür.
Görüşlərdə Rusiya ilə Azərbaycan arasında səmimi dostluq əlaqələrinin olduğu diqqətə çatdırılmış, ölkəmizin iqtisadiyyatının yüksək sürətlə inkişaf etdiyi, bu tərəqqinin təməlinin ümummilli lider Heydər Əliyev tərəfindən qoyulduğu, Prezident İlham Əliyevin Azərbaycan diasporuna göstərdiyi diqqət və qayğı xüsusi vurğulanmışdır.
Qeyd olunmuşdur ki, Azərbaycan ilə Arxangelsk vilayəti arasında ikitərəfli əlaqələrin inkişafı üçün böyük potensial vardır. Tərəflər qarşılıqlı səfərlər təşkil etmək, sərmayə yatırımlarını artırmaq, biznes-forumlar keçirmək, müştərək müəssisələr yaratmaq yolu ilə bu potensialdan səmərəli istifadə edə bilərlər. Novruz bayramı ərəfəsində min nəfərlik şəhər filarmoniyasında Azərbaycan və Sankt-Peterburq incəsənət xadimlərinin iştirakı ilə “Azərbaycan günləri” devizi ilə silsilə tədbirlər keçirilməsi barədə razılıq əldə olunmuşdur.
Hüquq mühafizə orqanlarının rəhbərləri ilə aparılan danışıqlarda soydaşlarımızın regionda qarşılaşdıqları problemlərdən bəhs olunmuşdur. Arxangelsk Vilayət Daxili İşlər, Miqrasiya Xidməti idarələrində və Prokurorluqda aparılan söhbətlər zamanı bildirilmişdir ki, regionda 8 minə yaxın azərbaycanlı yaşayır. Onların böyük əksəriyyəti hüquq qaydalarına ciddi əməl edir. Lakin müxtəlif səbəblərdən qeyri-leqal yaşayanlar da vardır. Qüdsi Osmanov problemin birgə səylərlə aradan qaldırılmasının vacibliyini vurğulamışdır.
Səfərin sonuncu günü Arxangelsk meriyasında keçirilmiş görüşdə Arxangelsk şəhəri ilə Azərbaycanın hər hansı bir şəhərinin qardaşlaşması, vilayətdə Azərbaycan incəsənət ustalarının iştirakı ilə mədəni kütləvi tədbirlərin keçirilməsi, Azərbaycan diasporu və Azərbaycan Beynəlxalq Bankının filialı üçün binaların ayrılması məsələləri müzakirə edilmişdir.
Baş konsul Azərbaycan diasporunun üzvləri ilə görüşmüş, soydaşlarımızın təşkilatlanmasının vacibliyini qeyd etmişdir. Görüşdə diasporun 19 nəfər fəal üzvündən ibarət şura yaradılmışdır.
Bölmənin digər xəbərləri
