Paytaxtın Nəsimi rayonunda müşavirə: Bütün sahələrdə məqsədyönlü fəaliyyət gücləndirilməlidir
Bakı, 16 oktyabr, AZƏRTAC
Yeni Azərbaycan Partiyasının (YAP) VIII Qurultayında Prezident İlham Əliyevin səsləndirdiyi fikirlər və müəyyənləşdirilən strateji hədəflər ölkəmizin gələcək inkişafı baxımından mühüm əhəmiyyət daşıyır. Qarşıya qoyulan vəzifələrin uğurla həyata keçirilməsi üçün bütün sahələrdə məqsədyönlü fəaliyyət gücləndirilməli, dövlətçilik ideologiyasının təbliğinə, milli-mənəvi dəyərlərin qorunmasına və gənc nəslin vətənpərvərlik ruhunda tərbiyəsinə xüsusi diqqət yetirilməlidir.
Bu fikirlər Nəsimi Rayon İcra Hakimiyyətində keçirilən Prezident İlham Əliyevin YAP-ın VIII Qurultayındakı çıxışından irəli gələn vəzifələrə həsr olunmuş müşavirədə diqqətə çatdırılıb.
AZƏRTAC xəbər verir ki, müşavirədə YAP Nəsimi rayon təşkilatının sədri Azər Süleymanov, rayon ərazisindəki ali təhsil müəssisələrinin, rayonun hüquq-mühafizə orqanlarının, rayon ərazisində fəaliyyət göstərən tam orta ümumtəhsil məktəblərinin, səhiyyə müəssisələrinin, idarə və xidmət sahələrinin, özəl subyektlərin rəhbərləri, ictimai birliklərin, gənclərin və rayon ictimaiyyətinin nümayəndələri iştirak ediblər.
Əvvəlcə Ulu Öndər Heydər Əliyevin və Azərbaycanın müstəqilliyi, ərazi bütövlüyü və suverenliyi uğrunda canlarından keçmiş şəhidlərimizin əziz xatirəsi bir dəqiqəlik sükutla anılıb, Dövlət Himni səsləndirilib.
Sonra Yeni Azərbaycan Partiyasının VIII Qurultayında Prezident İlham Əliyevin səsləndirdiyi mühüm fikirləri və qarşıda duran vəzifələri əks etdirən videoçarx nümayiş olunub.
Müşavirədə rayon icra hakimiyyətinin başçısı Tahir Budaqov geniş məruzə ilə çıxış edib. Məruzədə Azərbaycanın ərazi bütövlüyünün və mütləq suverenliyinin təmin edilməsi ilə nəticələnən tarixi Zəfərin əhəmiyyəti, ordu quruculuğunun daha da möhkəmləndirilməsi, işğaldan azad edilmiş ərazilərdə aparılan bərpa və quruculuq işləri, ölkə iqtisadiyyatının gücləndirilməsi, sahibkarlığın inkişafı və əhalinin rifahının yüksəldilməsi istiqamətində qarşıda duran vəzifələr diqqətə çatdırılıb.
Bildirilib ki, şəhid ailələrinə və müharibə iştirakçılarına göstərilən dövlət qayğısının yerlərdə həyata keçirilməsi, sosial müdafiə tədbirlərinin gücləndirilməsi və müasir idarəetmə prinsiplərinin tətbiqi üçün hər bir sahənin nümayəndəsi üzərinə düşən vəzifələri məsuliyyətlə yerinə yetirməli, ölkəmizin davamlı inkişafına töhfəsini verməlidir.
Rayon Ağsaqqallar Şurasının sədri, tibb elmləri doktoru, professor, əməkdar elm xadimi Vaqif Şadlinski YAP-ın yaranma tarixindən, Ulu Öndər Heydər Əliyevin siyasi irsindən və partiyanın bu günədək keçdiyi inkişaf yolundan danışıb. O, Prezident İlham Əliyevin rəhbərliyi ilə ölkəmizin qazandığı uğurları vurğulayaraq milli birliyin, dövlətçilik ənənələrinin və siyasi varisliyin qorunmasının əhəmiyyətini qeyd edib.
Digər natiqlərin çıxışlarında da təhsilin keyfiyyətinin yüksəldilməsi, səhiyyə xidmətlərinin təkmilləşdirilməsi, gənclərin vətənpərvərlik ruhunda tərbiyəsi, ordu quruculuğunun möhkəmləndirilməsi, şəhid ailələrinə və qazilərə dövlət qayğısının davam etdirilməsi, sahibkarlığın inkişafı və iqtisadi potensialın artırılması məsələlərinə diqqət yetirilib, qurultayda qarşıya qoyulan vəzifələrin həyata keçirilməsi istiqamətində hər kəsin öz sahəsində məsuliyyətlə fəaliyyət göstərməsinin önəmi vurğulanıb.
Bölmənin digər xəbərləri
