Arxeoloqlar Peruda 3500 il əvvələ aid şəhər tapıblar
Bakı, 4 iyul, AZƏRTAC
Arxeoloqlar Peruda 3500 il əvvəl mövcud olmuş şəhər tapıblar. O, ehtimal ki, Yaxın Şərq və Asiyada ilk sivilizasiyalarla eyni vaxtda çiçəklənən Sakit okean sahilləri mədəniyyətlərini And dağları və Amazondakı mədəniyyətlərlə birləşdirən ticarət mərkəzi rolunu oynayıb.
AZƏRTAC “Reuters” agentliyinə istinadla xəbər verir ki, tədqiqatçılar tərəfindən yayımlanan dron görüntüləri şəhər mərkəzinin dəniz səviyyəsindən təxminən 600 metr (1970 fut) hündürlükdə tikilmiş daş və palçıqdan olan binaların qalıqları ilə yamacın terrasındakı dairəvi quruluşla işarələndiyini göstərir.
Peniko adlı şəhər mərkəzi Barranka əyalətinin şimalında yerləşir və eramızdan əvvəl 1800-1500-cü illər arasında inşa edilib. Qədim yaşayış məskəni Amerika qitəsində ən qədim olan Karal-Supe sivilizasiyasının 5000 il əvvəl inkişaf etdiyi yerə yaxın olub.
Otuz iki monumental tikilidən ibarət olan Karal-Supe Misir, Hindistan, Şumer və Çində sivilizasiyaların müasiri hesab olunur. Lakin, onlardan fərqli olaraq, tədqiqatçıların fikrincə, tam təcrid olunmuş şəkildə inkişaf edib.
Penikoda tədqiqata rəhbərlik edən arxeoloq Rut Şedi yeni tapılan şəhərin tarixi öyrənmək baxımından çox mühüm olduğunu bildirib. Belə ki, ekspertlər Karal-Supe sivilizasiyasının iqlim dəyişikliyi nəticəsində süqut etdiyinə inanırlar. Arxeoloq əlavə edib: “Bu şəhər ticarət baxımından,, sahildə, dağlıq ərazilərdə və cəngəllikdə yaşayan icmalarla mübadilə üçün strateji bir məkanda yerləşib”.
Peru Mədəniyyət Nazirliyinin tədqiqatçısı, arxeoloq Marko Maçakuay mətbuat konfransında bildirib ki, Penikonun əhəmiyyəti onun Karal cəmiyyətinin davamı olmasındadır.
Səkkiz il davam edən tədqiqatlardan sonra arxeoloji ekspedisiya Penikoda mərasim məbədləri və yaşayış kompleksləri də daxil olmaqla 18-ə qədər tikili aşkarlayıb. Mərkəzi meydanın divarları heykəltaraşlıq relyefləri və səsi uzun məsafələrə yayılan pututu adlı alətin təsvirləri ilə seçilir. Arxeoloqlar digər binalarda insan və heyvan fiqurlarının gildən heykəlləri, mərasim əşyaları, muncuq boyunbağılar tapıblar.
Peru qədim mədəniyyətlərin mərkəzidir və Kuskodakı Maçu Pikçu İnka xarabalıqlarına, ölkənin mərkəzi sahili boyunca səhra bölgəsində yerləşən əsrarəngiz Nazka xətləri kimi arxeoloji obyektlərə malikdir.
Bölmənin digər xəbərləri
