Bakı, 29 mart, AZƏRTAC

“Azərbaycan Xəzər Dəniz Gəmiçiliyi” QSC-də (ASCO) görkəmli oftalmoloq-alim, akademik Zərifə Əliyevanın anadan olmasının 100 illiyi münasibətilə göz müayinəsi aksiyası keçiriləcək.

ASCO-dan AZƏRTAC-a bildirilib ki, “Dünyaya sağlam baxaq” devizi altında təşkil olunan profilaktiki tibbi aksiya Xəzər Dəniz Gəmiçiliyinin bütün struktur idarə və təşkilatlarını əhatə edəcək.

İlk müayinə günü aprelin 4-də Dəniz Nəqliyyatı Donanmasında baş tutacaq. Oftalmoloq-həkimlər 6 apreldə Xəzər Dəniz Neft Donanmasında, 11 apreldə “Zığ” Gəmi Təmiri və Tikintisi Zavodunda, 13 apreldə “Bibiheybət” Gəmi Təmiri Zavodunda, 17 apreldə ASCO-nun aparatında, 19 apreldə Azərbaycan Dövlət Dəniz Akademiyasında olacaqlar. ASCO-nun tərkibində fəaliyyət göstərən digər strukturlarda çalışan əməkdaşlar isə qeyd olunan tarixlərdə özlərinə yaxın ərazidə yerləşən idarəyə yaxınlaşmaqla müayinədən keçə biləcəklər.

Tədbirin məqsədi əməkdaşların, eləcə də ASCO-nun tərkibində fəaliyyət göstərən təhsil müəssisələrinin tələbələrinin gözləri ilə bağlı problemləri aşkarlamaq və onların aradan qaldırılmasına çalışmaqdan ibarətdir.