Aşıq Şəmşirin anadan olmasının 119-cu ildönümü yaddaqalan xatirə gecəsi ilə qeyd edilmişdir
Bakı, 17 mart (AZƏRTAC). Martın 17-də Beynəlxalq Mətbuat Mərkəzində “Aşıq Şəmşir” Mədəniyyət Ocağı İctimai Birliyinin təşkilatçılığı ilə ustad sənətkarın anadan olmasının 119-cu ildönümünə həsr olunmuş xatirə gecəsi keçirilmişdir.
AZƏRTAC xəbər verir ki, filologiya elmləri doktoru Məhərrəm Qasımlı Aşıq Şəmşir yaradıcılığı haqqında geniş məlumat vermişdir. Bildirilmişdir ki, Dədə Şəmşirin adı gələndə göz önündə Dəlidağın möhtəşəmliyi canlanır. Ustad aşıq şəxsiyyəti və yaradıcılığı ilə o ucalığı qoruyub saxlayan sənətkarlardan olmuşdur.
Nəzərə çatdırılmışdır ki, Aşıq Şəmşir (1893-1980) Kəlbəcər rayonunun Dəmirçidam kəndində görkəmli el sənətkarı, şair Qurbanın ailəsində dünyaya göz açmışdır. Şair Qurban Aşıq Ələsgərin müasiri olmuş, onların yaxın ünsiyyətindən bir sıra deyişmələri yadigar qalmışdır. Belə bir mühitdə daxili dünyasını zənginləşdirən Şəmşir çox keçmədən istedadlı aşıq şairinə çevrilmiş və Dədəlik mərtəbəsinə qədər ucalmış, aşıq-ozan sənətinin inkişafına öz töhfəsini vermişdir.
Kəlbəcər-Göycə, Qarabağ-Gəncəbasar ellərində məşhur olan Aşıq Şəmşiri bütün Azərbaycana daha yaxından tanıdan isə Xalq Şairi Səməd Vurğun olmuşdur. Onların deyişmələri həmin tarixi günlərin poetik ovqatını və təravətini indi də saxlayır. Dədə Şəmşir aşıq şeirinin müxtəlif poetik formalarında qələmə aldığı nümunələrlə Kəlbəcər ədəbi mühitinin qüdrətli söz sənətkarı kimi fərdi məktəbini yaratmışdır.
M.Qasımlı bir mütəxəssis kimi, Aşıq Şəmşirin barmaqlarının saz çalan yüzlərlə aşığın barmaqlarından seçildiyini söyləmişdir. Həmçinin aşığın dastan söyləyərkən teatral ifasının heç də hər sənətkara nəsib olmadığını vurğulamışdır. Qeyd olunmuşdur ki, musiqişünas Əminə Eldarova Dədə Şəmşirin irsinin qorunması və təbliği sahəsində ən böyük işi görmüş, ustad sənətkarın ifasında 75 aşıq havasını lentə köçürmüşdür.
Milli Məclisin deputatı, Xalq Şairi Sabir Rüstəmxanlı Aşıq Şəmşir yaradıcılığının Azərbaycan poeziyasında rolundan danışmışdır. Bildirilmişdir ki, məhz Aşıq Şəmşir kimi sənətkarlarımızın şeirləri indi Ermənistan silahlı qüvvələri tərəfindən işğal olunmuş torpaqlarımızın ətrini, xatirəsini qoruyub saxlayır, eyni zamanda, o torpaqlara dönmək ruhunu saxlayır. Xalq Şairi ustad aşıqla Bakıda keçirilmiş görüşləri tədbir iştirakçıları ilə bölüşərək o günləri özünün ən böyük xatirəsi adlandırmışdır.
Vurğulanmışdır ki, məhz ulu öndərimiz Heydər Əlitev onun sənətinə yüksək qiymət verərək 2003-cü il iyulun 5-də Əməkdar İncəsənət Xadimi, “Şərəf” ordenli Aşıq Şəmşirin anadan olmasının 110 illiyinin ölkə miqyasında qeyd edilməsi ilə bağlı Sərəncam imzalamışdır. Həmçinin, Sərəncama əsasən Göygöl rayonundakı yeddiillik musiqi məktəbinə Aşıq Şəmşirin adı verilmiş və büstü ucaldılmışdır. Ulu öndərimizin müdrik siyasətini uğurla davam etdirən Azərbaycan Respublikasının Prezidenti İlham Əliyevin, ölkənin birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyevanın yüksək diqqət və qayğıları sayəsində aşıq sənəti UNESCO-nun Qeyri-maddi mədəni irs siyahısına daxil edilmişdir. Bu hadisə təkcə sənətsevərlər deyil, bütünlükdə xalqımız tərəfindən yüksək dəyərləndirilir. Bu, həmçinin Aşıq Şəmşirin timsalında haqq dərgahına qovuşmuş aşıqlarımızın ruhuna olan hörmətin ifadəsidir.
Tədbirdə şair publisist, Əməkdar Mədəniyyət İşçisi Məmməd Aslan uzun illər ünsiyyətdə olduğu Aşıq Şəmşirlə bağlı xoş xatirələrini tədbir iştirakçıları ilə bölüşmüşdür.
Digər çıxışlarda Aşıq Şəmşir yaradıcılığının xüsusiyyətlərindən danışılmışdır. Bildirilmişdir ki, XX əsrin 70-ci illərində sənətkarın ümummilli liderimiz Heydər Əliyevə həsr etdiyi şeirlər bu gün də zamanla səsləşir.
Ümummilli liderimizin Aşıq Şəmşirlə bağlı söylədiyi “Qədim köklərə malik olan Azərbaycan aşıq sənəti ənənələrinin davam etdirilməsi və zənginləşdirilməsində Aşıq Şəmşirin böyük əməyi vardır” fikri tədbir iştirakçılarının diqqətinə çatdırılmışdır.
1992-ci ilin aprelində erməni quldurları Dədə Şəmşirin doğma kəndi Ağdabanda əsl soyqırımı törətmişlər. Ustad sənətkarın ən yaxın qohum-əqrəbası amansızlıqla qətlə yetirilmişdir. Ağdabanlı şair Qurbanın və Dədə Şəmşirin əlyazmaları tamamilə yandırılaraq məhv edilmişdir.
Tədbirdə Aşıq Şəmşirlə bağlı videoçarx nümayiş etdirilmiş, fotoları və şeirləri əsasında hazırlanmış açıqcalar tədbir iştirakçılarına paylanılmışdır. Kəlbəcər məktəblilərinin ifasında Aşıq Şəmşirin əsərləri səslənmişdir.
Sonda ustad sənətkarın oğlu, “Aşıq Şəmşir” Mədəniyyət Ocağı İctimai Birliyinin sədri Qənbər Qurbanov tədbir iştirakçılarına təşəkkürünü bildirmişdir.
Bölmənin digər xəbərləri
