Aslan Kərimov: Yarımfinaldakı komandaların dünya çempionu olmaq şansları bərabərdir
Bakı, 14 iyul, AZƏRTAC
Fikrimcə, yarımfinalçıların dünya çempionu olmaq şansları bərabərdir. Çünki hər dörd milli komandanın özünəməxsus üstün və zəif tərəfləri var.
Bu sözləri AZƏRTAC-a açıqlamasında AFFA-nın Məşqçilərin maarifləndirmə şöbəsinin müdiri Aslan Kərimov dünya çempionatının yarımfinal mərhələsinin oyunları ilə bağlı danışarkən deyib.
Bu gün Fransa və İspaniya kollektivləri arasında keçiriləcək ilk yarımfinal matçını dəyərləndirən mütəxəssis qalibi təxmin etməyin çətin olduğunu vurğulayıb: “Fransızlar bütün mövqelər üzrə balanslaşdırılmış oyun nümayiş etdirirlər. Hücum xətti olduqca güclüdür və istənilən rəqibin qapısına yol tapa bilirlər. İspaniya isə bu çempionatda qapısından cəmi bir qol buraxıb. Kombinasiyalı oyun tərzləri sayəsində hər bir rəqibə qarşı effektiv hücumlar qurmağı bacarırlar. Bu səbəbdən yığmalardan hansının finala adlayacağını təxmin etmək çox çətindir. Şansları bərabər qiymətləndirirəm”.
Argentina və İngiltərə yığmalarını üz-üzə gətirəcək digər yarımfinal matçı barədə də danışan Aslan Kərimov hər iki tərəfin fərqli üstünlüklərə malik olduğunu qeyd edib: “Kağız üzərində heyət baxımından ingilislər cüzi fərqlə öndə görünə bilərlər. Lakin argentinalıların son saniyələrə qədər mübarizə aparmaq əzmkarlığı və heyətlərində Lionel Messi kimi istənilən an fərdi ustalığı sayəsində oyunun taleyini həll edə biləcək ulduz futbolçunun olması tərəzinin gözlərini bərabərləşdirir. İngiltərə yığmasının Norveçlə qarşılaşmada müdafiə xəttində müəyyən boşluqlar verdiyini gördük. Argentinalılar bu cür səhvlərdən məharətlə istifadə edə bilirlər. Bu baxımdan, həmin cütdən də kimin finala çıxacağını söyləmək qeyri-mümkündür”.
Azərbaycan millisinin sabiq futbolçusunun sözlərinə görə, bu dörd güclü komandadan kimin finala yüksəlməsindən asılı olmayaraq, həlledici qarşılaşma gərgin mübarizə ilə yadda qalacaq və hər birinin kuboka sahib çıxmaq ehtimalı eynidir.
Qeyd edək ki, Fransa - İspaniya oyunu bu gün Bakı vaxtı ilə saat 23:00-da başlayacaq. İkinci yarımfinal görüşü iyulun 15-də keçiriləcək. Mundialın final görüşü iyulun 19-da baş tutacaq.
Bölmənin digər xəbərləri
