Astarada bu il 2 mindən çox gənc ilk dəfə səs verəcək
Astara, 13 yanvar, İlkin Adıyev, AZƏRTAC
Fevralın 7-nə təyin olunan növbədənkənar prezident seçkiləri ilə bağlı səsvermə 79 saylı Astara seçki dairəsi üzrə 50 məntəqədə də keçiriləcək.
AZƏRTAC-ın bölgə müxbiri rayonda seçkilərə hazırlıqla bağlı görülən işlərlə yerində tanış olmaq məqsədilə 79 saylı Astara seçki dairəsinin bir neçə seçki məntəqəsində olub.
Dairə Seçki Komissiyasının sədri Hikmət Əkbərov bildirib ki, dairə üzrə seçki məntəqələrində səsvermənin şəffaf və demokratik keçirilməsi üçün bütün şərait yaradılıb.
“Seçki məntəqələrində seçkilərə hazırlıq işləri qanunvericiliyin tələblərinə uyğun olaraq aparılır. Demək olar ki, hazırlıq işləri yekunlaşmaq üzrədir. Dairə üzrə 48 min 648 seçici qeydə alınıb. Qeydə alınan ən yaşlı seçicinin 101 yaşı var. Bu il ilk dəfə səsvermə hüququ qazanan gənclərin sayı isə 2 mindən çoxdur. Bütün seçki məntəqələri lazımi avadanlıqla, rabitə və digər texniki vasitələrlə, təşviqat plakatları, seçkilərlə bağlı təlimatlarla təmin edilib. Səsvermənin gedişini izləmək üçün 11 seçki məntəqəsində veb-kamera quraşdırılıb”, - deyə komissiya sədri bildirib.
Bölmənin digər xəbərləri
