Atıcılıq üzrə dördüncü beynəlxalq turnir keçirilir
Salyan, 2 noyabr (AZƏRTAC). Salyan Olimpiya Kompleksində atıcılıq üzrə dördüncü beynəlxalq Qran Pri turnirinin rəsmi açılış mərasimi olmuşdu.
AZƏRTAC xəbər verir ki, Salyanda atıcılıq üzrə keçirilən dördüncü beynəlxalq Qran Pri turnirinin iştirakçıları əvvəlcə ümummilli lider Heydər Əliyevin abidəsi önünə gül dəstələri qoyaraq xatirəsini ehtiramla yad etmişlər. Sonra Salyan Olimpiya Kompleksində turnirin rəsmi açılış mərasimi olmuşdur. Mərasimə Azərbaycan, Rusiya, Ukrayna, Belorus, Gürcüstan, Fransa və İtaliya təmsilçiləri ilə yanaşı sportinq üzrə Beynəlxalq Atıcılıq Federasiyasının rəsmiləri də qatılmışdır.
Tədbirdə çıxış edənlər idman bayramı münasibəti və iştirakçıları təbrik etmiş, onlara uğurlar arzulamışlar. Ölkəmizdə idmana göstərilən dövlət qayğısından, regionların inkişafından danışan natiqlər Salyan Olimpiya Kompleksini və burada beynəlxalq turnirin baş tutmasını bunun bariz nümunəsi kimi səciyyələndirmişlər.
Azərbaycanın artıq dünyada idman ölkəsi kimi tanındığını qeyd edən Beynəlxalq Atıcılıq Federasiyasının sədri Jan Fransua Palinkas bildirmişdir ki, regionlarda belə mötəbər idman yarışlarının keçirilməsi üçün yaradılan şərait çox sevindiricidir.
Turnirdə yeddi ölkədən 50-dən çox idmançının iştirak etdiyini söyləyən Azərbaycan Atıcılıq Federasiyasının vitse -prezidenti Rasim Rzayev ölkəmizin idman sahəsində əldə etdiyi uğurları konkret faktlarla diqqətə çatdırmışdır.
Mərasimdə çıxış edən idmançılar onlara yaradılan bu imkandan razılıqlarını bildirmişlər.
Tədbir təqdim olunan maraqlı konsertlə davam etmişdir. Atıcılıq üzrə dördüncü beynəlxalq Qran Pri turniri iki gün davam edəcəkdir.
Bölmənin digər xəbərləri
