ATMU-da elmi konfrans: Müasir dövrdə effektiv idarəetmənin problemləri
Bakı, 22 noyabr, AZƏRTAC
Azərbaycan Turizm və Menecment Universitetində (ATMU) “Müasir dövrdə effektiv idarəetmənin problemləri” mövzusunda VI respublika elmi konfransı keçirilib.
Bu barədə AZƏRTAC-a ATMU-dan məlumat verilib. Bildirilib ki, onlayn tədbiri universitetin rektoru İlham Mədətov açaraq ən mühüm vəzifələrdən birinin bütün sahələr və istiqamətlər üzrə müasir idarəetmənin nəzəri və metodoloji problemlərini araşdırmaq və həll etməkdən ibarət olduğunu söyləyib.
“Elə bir sahə yoxdur ki, orada idarəetməyə ehtiyac olmasın. İdarəetmə insanların fəaliyyətini istiqamətləndirməklə və onların davranışlarının əsaslarını yaratmaqla məqsədə çatmaq bacarığı olub, insan fəaliyyətinin bütün sahələrinə aid edilir. Bazar münasibətlərində baş verən dəyişikliklər iqtisadi sistemin mahiyyətini dəyişdirərək bütövlükdə idarəçilik münasibətlərində də dəyişiklik etməyə sövq edir. İdarəetmə münasibətlərində dəyişiklik isə yeni bazar münasibətləri şəraitində idarəetmənin təkmilləşdirilməsini və inkişafını nəzərdə tutur. Müasir cəmiyyətdə idarəetmənin təkmilləşdirilməsinin və inkişafının əsasında idarəetmə nəzəriyyələrinin və konsepsiyalarının formalaşdırılması və inkişafı durur. Ona görə də müasir idarəetmə nəzəriyyələrinin və konsepsiyalarının öyrənilməsi aktual məsələdir, eyni zamanda, mühüm nəzəri və praktiki əhəmiyyət kəsb edir”, - deyə rektor bildirib.
Universitetin tədris işləri üzrə prorektoru professor Zaur Bağırov “Müasir təhsil sistemi və onun idarə edilməsində qarşıya çıxan problemlər” mövzusunda çıxış edib. O bildirib ki, təhsil sistemi, bütövlükdə onun strukturu, fəaliyyət prinsipləri və inkişaf istiqamətləri dövlət tərəfindən müəyyən edilir və formalaşdırılır. Azərbaycan Respublikasında təhsil sahəsində dövlət siyasətinin prinsipləri “Təhsil haqqında” Qanunda öz əksini tapıb. Müasir cəmiyyətin təhsil və təlim sahəsində qarşıya qoyduğu məqsəd və vəzifələrin həyata keçirilməsini müvafiq təhsil sistemi olmadan təsəvvür etmək mümkün deyil.
Plenar iclasda universitetin Elm və innovasiya şöbəsinin müdiri dosent Nəsirulla Nəsirli “Azərbaycanda müasir təhsilin aktual problemləri” mövzusunda çıxışında bildirib ki, Azərbaycan Respublikasının bazar münasibətlərinə keçidi peşə təhsili sistemi qarşısında yeni məqsədlər qoydu və onların həlli sistemin özünün dərin transformasiyasını tələb edir. Respublikada 1990-cı illərə qədər cəmiyyətin və onun iqtisadiyyatının inkişafına cavab verən sərt peşə təhsili sistemi mövcud idi. Belə sistem təhsil proqramlarının məzmununun dəyişdirilməsi baxımından, eləcə də təhsilin təşkilati formalarında tələbə və müəllimlərin təşəbbüskarlığını və yaradıcı yanaşmasını praktiki olaraq istisna edirdi. Transformasiyalar mütləq şəkildə həm mövcud təhsil sisteminin təkmilləşdirilməsinə, həm də iqtisadiyyatın müasir inkişafına və dövlətin sosial siyasətinə uyğun olaraq onun inkişafı üçün proqnozlar əsasında yeni yanaşma və şəraitin formalaşmasına təsir göstərməlidir.
Konfrans işini bölmə iclasları ilə davam etdirib. Məruzələr “Dövlət siyasətində idarəetmənin yeri və idarəetmədə hüquq problemləri”, “Sosial və xidmət sahələrinin idarə edilməsi problemləri”, “Korporativ idarəetmə və biznesin idarə edilməsi” bölmələri üzrə mövzuları əhatə edib.
Bölmə iclaslarında ATMU-nun professoru Məhərrəm Zülfüqarlının “Sovet totalitarizminin yumşalma dövrünün idarəetmə siyasəti”, professor Minaxanım Əsədovanın “Açıq səmada olan muzeylərin kulturoloji əhəmiyyəti”, universitetin baş müəllimi Tofik İmanovun “Karabax: istoriçeskaya realnost i faktı” mövzularında məruzələri dinlənilib.
Konfrans yekun plenar iclasla başa çatıb.
Bölmənin digər xəbərləri
