AVCİYA-nın BMT-yə təqdim etdiyi hesabatda Ermənistanın yalanları ifşa olunur
Bakı, 8 aprel, AZƏRTAC
BMT-nin İrqi ayrı-seçkiliyin bütün formalarının ləğv edilməsi üzrə komitəsində 24 aprel-12 may tarixlərində Ermənistanın 2010-2015-ci illər üçün dövrü hesabatı müzakirə ediləcək.
AZƏRTAC xəbər verir ki, Ermənistan dövləti bu hesabatında irqi ayrı-seçkiliyin bütün formalarının ləğv edilməsi haqqında BMT Konvensiyasının tələblərinin təmin edilməsi vəziyyəti - qaçqınlar, milli azlıqlara qarşı ayrı-seçkilik, dini tolerantlıq və sair barədə məlumat verib. Lakin həmişə olduğu kimi, bu hesabatda da Ermənistan öz yalanları ilə, mövcud duruma müsbət don geyindirməklə beynəlxalq ictimaiyyəti aldatmağa çalışır.
Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) Ermənistanın adıçəkilən hesabatına alternativ hesabat hazırlayaraq ingilis, rus, ispan, italyan, ərəb və fransız dillərində BMT-yə təqdim edib. AVCİYA-nın bu hesabatında Ermənistanın növbəti yalanları, saxtakarlıqları tam ifşa edilib. Alternativ hesabat artıq BMT-nin rəsmi internet resursunda yerləşdirilib.
Hesabatda bildirilir ki, Ermənistan Respublikası hesabatının Azərbaycan Respublikası ilə münasibətlərə aid hissələrində tarixi faktları saxtalaşdırıb. Avropa Şurası Parlament Assambleyasının 2016-cı ilin yanvar sessiyasında qəbul etdiyi “Azərbaycanın sərhədyanı rayonlarının sakinləri qəsdən sudan məhrum edilir” adlı qətnamə (2085 saylı) Ermənistan dövlətinin Azərbaycanın Dağlıq Qarabağ bölgəsini və digər ərazilərini işğal etməsi faktını təsdiq edir. Ermənistan Respublikası işğal edilmiş ərazilərdə etnik təmizləmə, mülki əhalinin kütləvi qətliamları, digər beynəlxalq cinayətlərə və məsul şəxsləri hüquqi məsuliyyətə cəlb etməməyə görə birbaşa cavabdehlik daşıyır. Ermənistan 2085 saylı qətnamədə vurğulanan, işğal altındakı Sərsəng su anbarı vasitəsilə Azərbaycana “ekoloji təcavüz”, digər etnik qrupa - azərbaycanlılara qarşı edilən humanitar, mənəvi, iqtisadi, ekoloji və bioloji təhdidlər edir. Ermənistan qonşu ölkənin ərazisində apardığı hərbi əməliyyatlara və insanların etnik əsaslarla öldürülməsinə, bu qəbildən olan şəxsləri əsirlikdə saxlamaqla, onlar barədə məlumat verməməklə, onlara qarşı zorakılıq, qeyri-insani rəftar tətbiq edilməsinə görə məsuliyyət daşıyır. Azərbaycanın Dağlıq Qarabağ və işğal edilmiş digər ərazilərində Suriya, İraq, Livan və digər yerlərdən olan qaçqınların qanunsuz olaraq yerləşdirilməsi siyasəti və tədbirləri BMT-nin irqi ayrı-seçkiliyin bütün formalarının ləğvi haqqında Konvensiyasının tələblərinin birbaşa pozulmasıdır. Daimi yaşayış yerlərindən məcburi köçürülmüş (deportasiya olmuş) azərbaycanlıların və digər etnik qrupların Azərbaycanın Dağlıq Qarabağ bölgəsinə və işğal edilmiş digər ərazilərinə və Ermənistan Respublikasının ərazisinə qayıtmasının qarşısının alınmasına görə Ermənistanın siyasi hakimiyyəti məsuliyyət daşıyır. Ermənistan Respublikası azərbaycanlılara məxsus dini ocaqları və tarixi abidələri dağıdır, mənşəyini saxtalaşdırır. Ermənistanda irqi ayrı-seçkiliyi təşviq edən siyasi təşkilat fəaliyyət göstərir. 2011-ci ildə BMT-nin həmin təşkilatın qanuni yolla kənarlaşdırılması barədə çağırışına da Ermənistan dövləti tərəfindən məhəl qoyulmayıb.
AVCİYA-nın təqdim etdiyi hesabatda bu kimi mühüm faktlar yer alır, eyni zamanda, sadalanan məsələlərlə bağlı BMT komitəsinə Ermənistan dövləti tərəfindən izahat verilməsi tələb edilir. Bildirilir ki, BMT-nin irqi ayrı-seçkiliyin bütün formalarının ləğvi üzrə komitəsi Ermənistan Respublikasından azərbaycanlılara və etnik mənsubiyyəti fərqli olan digər qruplara irqə görə ayrı-seçkiliyi ləğv etməsini, irqə görə nifrət siyasətinə son qoymasını və buna aparan istənilən ictimai təşəbbüsün pislənməsini və qarşısının alınmasını tələb etməlidir.
Bölmənin digər xəbərləri
