AVROPA BİRLİYİ AZƏRBAYCANDAKI LAYİHƏLƏRİ DAVAM ETDİRMƏK NİYYƏTİNDƏDİR
Hazırda həyata keçirilən layihələrdən biri – “Azərbaycanda maliyyə bazarının inkişafı” layihəsi təqribən 1,1 milyon avro dəyərindədir, bunun da 1 milyonu texniki yardıma, 100 mini isə avadanlıq alınmasına sərf ediləcəkdir.
Yanni Boşşev demişdir ki, Avropa Birliyi Azərbaycana yardımı, xüsusən maliyyə bazarının inkişafı layihələrinin həyata keçirilməsinə yardımı davam etdirməkdə maraqlıdır. Bununla əlaqədar, Nazirlər Kabineti ilə danışıqlar aparılır. Biz cari və gələcək layihələr arasında fasilələrin az olmasını istərdik.
Y.Boşşevin sözlərinə görə, daha 4 layihə gözlənilir. Əsas layihələrdən biri Ədliyyə Nazirliyinin fəaliyyəti ilə bağlıdır. Qalanları isə nəqliyyat və statistika sahələrinə aiddir.
Layihənin direktoru cənab Tim Levyen söhbət zamanı, əlavə etmişdir ki, Avropa Birliyinin məqsədi Azərbaycanda maliyyə bazarının inkişafını təmin etmək üçün baza yaratmaqdır. Bəlkə də, indi bizim fəaliyyətimizi qiymətləndirənlər azdır, lakin bir müddətdən sonra, ölkənin maliyyə qurumları yaxşı səviyyəyə çatanda Azərbaycanın hər bir sakini gündəlik həyatında onun rolunu hiss edəcəkdir. Axı, investisiyaları, pensiyaları, müavinətləri və sairəni ödəmək üçün mənbələr məhz bazarda yaranır.
Avropa Evinin mətbuat katibi Sahib Məmmədov isə bildirmişdir ki, Avropa Birliyi layihələrinin həyata keçirilməsi üzrə qrupun nümayəndələri respublikanın aqrar sektoru ilə də yaxşı tanışdır və onun problemlərini bilirlər. Məsələn, Avropa Birliyi Ərzaq Təhlükəsizliyi layihəsi, bir qədər sonra isə Azərbaycan fermerlərinin kreditləşdirilməsi layihəsi çərçivəsində yardım göstərmişdir. 2002-ci ildə Aqrar-Kredit Fonduna yardım və onun özəlləşdirilməsinə hazırlıq üzrə yeni layihə başlanmışdır. Lakin layihə başa çatarkən iki qurum Aqrar-Kredit Fondu və Aqrar-Kredit Səhmdar Cəmiyyəti birləşdi. Bu isə, Avropa Birliyi ekspertlərinin fikrincə fermerlərin kreditləşdirilməsi prosesinin təkmilləşməsinə kömək edəcəkdir. Həmin layihə cari ilin may ayında başa çatacaqdır.
Bölmənin digər xəbərləri
