Avropa İttifaqına üzv ölkələr hərbi xərclər üçün büdcə kəsirinin artırılmasını tələb edir
Bakı, 3 iyun, AZƏRTAC
Avropa İttifaqına 27 üzv ölkədən 16-sı hərbi xərclərin təmin olunması məqsədilə dövlət büdcəsi kəsirlərini 1,5 faiz artırmaq üçün Avropa Komissiyasına müraciət edib.
AZƏRTAC xəbər verir ki, bu barədə Avropa Komissiyasının nümayəndəsi Balaş Uyvari məlumat yayıb.
“Avropa İttifaqının bəzi ölkələri büdcə normalarına milli istisnalar haqqında müddəanın işə salınmasını tələb edir”, - deyə Balaş Uyvari bildirib.
Büdcə normalarına milli istisnalar haqqında müddəa Avropa Komissiyasının sənayenin hərbiləşdirilməsi planının bir hissəsidir. O, 2030-cu ilədək silah və hərbi texnika istehsalına əlavə investisiyaların cəlb edilməsi məqsədilə icazə verilən maksimum büdcə kəsirinin ümumi daxili məhsulun 3-4,5 faizədək artırılması imkanını nəzərdə tutur. Brüssel bu yolla hərbi xərclərini beş il ərzində 800 milyard avro artırmağa çalışır.
Qeyd edək ki, Avropa İttifaqının Sabitlik və İnkişaf Paktı üzv ölkələrin büdcə kəsirinin maksimum səviyyəsini ümumdaxili məhsulun 3 faizi, dövlət borcunun maksimum səviyyəsini isə ÜDM-in 60 faizi səviyyəsində müəyyən edir.
Bölmənin digər xəbərləri
