Avropa Liqasının Bakıda keçiriləcək finalı barədə nələri bilməlisiniz
Bakı, 6 may, AZƏRTAC
Avropa Liqasının Bakıda keçiriləcək finalı barədə bunları bilməyiniz məsləhətdir.
AZƏRTAC xəbər verir ki, UEFA Avropa Liqasının mükafatı uğrunda mübarizə yarımfinal oyunlarının qalibləri arasında gedəcək. “Ayntraxt” “Çelsi” ilə, “Arsenal” isə “Valensiya” ilə qarşılaşacaq. Finalçı komandaların dəqiq heyəti mayın 9-da məlum olacaq.
UEFA Avropa Liqasının finalı ilk dəfə UEFA Çempionlar Liqasının finalına cəmi dörd gün qalmış - bu il mayın 29-da Bakı vaxtı ilə saat 23:00-da keçiriləcək. Beləliklə, həlledici görüş milli assosiasiyalarda mövsümlər başa çatandan sonra keçiriləcək.
Mart ayında keçirilmiş püşkatmada final görüşünün nominal ev sahibi müəyyən olunub. Bu, “Ayntraxt”-“Çelsi” qarşılaşmasının qalibi olacaq. Hər iki komandanın futbolçuları əsas formada çıxış edəcəklər, lakin əgər formaların rəngləri üst-üstə düşərsə, nominal qonaqlar (“Arsenal” və ya “Valensiya”) ehtiyat forma geyinməli olacaqlar.
Avropada əsas kuboklardan biri ilk dəfə olaraq Azərbaycanda keçiriləcək. Final oyununu Bakıdakı Olimpiya stadionu qəbul edəcək. 2020-ci il Avropa çempionatının final mərhələsində 3 matç da 2015-ci ildə açılmış bu arenada keçiriləcək.
Olimpiya stadionu 2016-cı ildə 17 yaşa qədər gənclər arasında Avropa çempionatının final görüşlərinə də ev sahibliyi edib. Burada Azərbaycan-Polşa açılış matçına turnir üçün rekord sayda - 33 min azarkeş toplaşmışdı. Bakı 2012-ci ildə 17 yaşa qədər qızlar arasında dünya çempionatının və 2014-cü ildə futzal üzrə UEFA kubokunun final turnirini də qəbul edib.
Avropa Liqasının final oyununun Bakıdakı Olimpiya stadionunda keçirilməsi haqqında qərar UEFA İcraiyyə Komitəsinin iclasında qəbul edilib.
Stadion 70 minə yaxın tamaşaçı tutur. Əsla şübhə yoxdur ki, 1999-cu ildə Moskvada final oyununa gələnlərin sayına görə müəyyən olunmuş rekord bu dəfə təzələnəcək. Xatırladaq ki, o vaxt “Parma” ilə “Latsio” arasında oyuna 62 min tamaşaçı baxırdı.
Bu, Avropa Liqası tarixində VAR sisteminin tətbiq ediləcəyi ilk matç olacaq. Əgər əlavə vaxt təyin edilərsə, komandalar əlavə dəyişiklik etmək hüququ əldə edəcəklər. Arbitrlər briqadasının heyəti finala yaxın günlərdə təsdiq ediləcək.
Avropa Liqasının kuboku. Bu kubokun dəstəyi yoxdur, çəkisi 15 kiloqramdır və Avropada ən ağır klub trofeyidir. Qalib komandanın futbolçuları və məşqçilər qərargahı üçün 40 medal ayrılacaq. Bundan əlavə, qalib komanda 2018-2019-cu illər mövsümünün UEFA Çempionlar Liqasının qrup mərhələsinə birbaşa vəsiqə alacaq.
Bölmənin digər xəbərləri
