Avropa Ukrayna üçün “Starlink”ə alternativ peyk şəbəkəsi axtarır
Bakı, 14 mart, AZƏRTAC
Avropa ölkələrinin hökumətləri Ukrayna üçün “Starlink”ə alternativ peyk rabitəsi təminatçılarına müraciət ediblər.
AZƏRTAC xəbər verir ki, “Euractiv” portalının məlumatına görə, alternativ axtarışlar “Starlink” peyk şəbəkəsinin sahibi İlon Maskın Ukrayna ordusunun rabitə və pilotsuz uçuş aparatlarına nəzarət üçün istifadə etdiyi xidməti bağlayacağı ilə bağlı narahatlıqlar fonunda aparılır.
Avropa Komissiyasının sənəd layihəsinə əsasən, Brüssel Avropa provayderlərinin peyk rabitəsi xidmətlərinə çıxışını maliyyələşdirməlidir. Hazırda bütün Avropada belə rabitəni yalnız Fransanın “Eutelsat” şirkəti təmin edə bilər.
Hazırda Ukraynada təxminən 40 min “Starlink” və 2 min “Eutelsat” terminalı fəaliyyət göstərir. Eyni zamanda, daha 4 min “Eutelsat” terminalı istismara hazırdır.
“Financial Times” qəzetinin məlumatına görə, Avropanın dörd peyk operatoru “Starlink” sisteminin Ukraynada bağlanacağı təqdirdə Kiyevə kömək üçün variantlar üzərində işləyir.
Bölmənin digər xəbərləri
