Avropalıların ABŞ-a olan etimadı azalır
Praqa, 21 aprel, AZƏRTAC
Sorğunun nəticələrinə görə, Avropa İttifaqı ölkələrinin əhalisinin əksəriyyəti ABŞ-ın onların ölkələrinə qarşı tətbiq etdiyi gömrük rüsumlarını mənfi qarşılayır.
AZƏRTAC xəbər verir ki, bu fikirlə respondentlərin 75 faizi razıdır. Xatırladaq ki, ABŞ rəhbərliyi əlavə tariflərin tətbiqini elan etdikdən dərhal sonra Amerika fond bazarlarında kəskin eniş baş verib və Avropa İttifaqı cavab tədbirləri görəcəyini bəyan edib. Bir neçə gün sonra Ağ ev bu tariflərin böyük bir hissəsinin tətbiqini 90 gün müddətinə dayandırıb. Qərar elan ediləndən əvvəl, həm də sonra keçirilən sorğuda respondentlərin fikirlərində ciddi fərq qeydə alınmayıb. Təxminən dörd respondentdən üçü yeni tariflərin tətbiqi ilə razı olmadığını bildirib.
Bundan əlavə, respondentlərin 57 faizi hesab edir ki, bu cür tədbirlər Aİ-nin ABŞ-a olan etimadını qismən zəiflədir.
Avropalıların yalnız 28 faizi ABŞ-ı Avropanın müttəfiqi hesab edir. Daha az müsbət rəy isə yalnız Rusiya ilə bağlı qeydə alınıb, belə ki, avropalı respondentlərin cəmi 3 faizi Rusiyanı dost hesab edir.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
