Avstraliya hakimiyyəti koalaların kütləvi şəkildə məhv edilməsinə icazə verib
Bakı, 23 aprel, AZƏRTAC
Son bir ay ərzində Avstraliyanın Viktoriya ştatında yerləşən Maunt Ekls (və ya Buc Bim) milli parkında hakimiyyətin göstərişi ilə snayperlər helikopterlərdən 750-yə qədər koalanı vuraraq öldürüblər.
AZƏRTAC xəbər verir ki, yüzlərlə koala ötən ay təxminən 2000 hektarlıq ərazini məhv edən meşə yanğınından sonra keçirilmiş heyvanların güllələnməsi üzrə “planlı” aksiya zamanı ölüb.
Təbiəti mühafizə orqanlarının nümayəndələri bildiriblər ki, bu addım zəruri olub, çünki yanğından sonra bir çox koala ciddi yaralanmış, susuzluqdan və ya aclıqdan ölmək üzrə imiş.
Hadisə Avstraliya əhalisi və heyvan müdafiəçilərinin kəskin reaksiyasına səbəb olub. Heyvan müdafiəçiləri bildiriblər ki, helikopterdən müşahidə aparmaq koalanın vəziyyətini düzgün qiymətləndirməyə imkan vermir. Bundan əlavə, yetkin fərdlərin məhv edilməsi onların balalarının da ölməsinə səbəb ola bilər.
Xatırladaq ki, koalalar artıq nəsli kəsilməkdə olan növlər sırasına daxil edilib.
Bölmənin digər xəbərləri
