Azərbaycan Avrasiyanın iqtisadi və geostrateji mənzərəsini formalaşdıran uğurlu siyasət həyata keçirir ŞƏRH
Bakı, 20 iyul, AZƏRTAC
IV Şuşa Qlobal Media Forumunda Prezident İlham Əliyevin çıxışı və səsləndirdiyi fikirlər Avrasiya qitəsində reallaşdırılan çoxsaylı inteqrasiya layihələri, regionun geostrateji mənzərəsi və Azərbaycanın artan rolu baxımından mühüm əhəmiyyət kəsb edib. Tədbir format etibarilə media ilə bağlı olsa da, Forumda qlobal məna kəsb edən və böyük geosiyasi, geoiqtisadi çəkiyə malik məsələlər ətrafında geniş və hərtərəfli müzakirələr aparılıb. Dövlətimizin başçısı öz çıxışında Azərbaycanın xarici siyasətinə nəzər salaraq, qitəmiqyaslı iqtisadi və logistik layihələrin reallaşmasındakı strateji baxışlarını bölüşüb.
Bu sözləri AZƏRTAC-a açıqlamasında Milli Məclisin deputatı Azər Allahverənov deyib.
O qeyd edib ki, bu gün Azərbaycan Avrasiya regionunun iqtisadi və geostrateji mənzərəsini formalaşdıran iki mühüm sütun üzərində uğurlu siyasət yürüdür. Bunlardan birincisi energetika və enerji təhlükəsizliyi məsələləri, ikincisi isə beynəlxalq yükdaşımalar, nəqliyyat və logistika infrastrukturlarının inkişafıdır.
“Xüsusilə beynəlxalq yükdaşımalar və nəqliyyat-logistika infrastrukturunun inkişafına gəldikdə, Orta Dəhliz layihəsinin uğurla reallaşdırılması bilavasitə Azərbaycanın zamanında uzaqgörənliklə inşa etdirdiyi Bakı-Tbilisi-Qars dəmir yolu xətti ilə bağlıdır. Bu xətt Orta Dəhlizin ana seqmentlərindən biri kimi özünü doğruldub. İldən-ilə dəhliz vasitəsilə daşınan yüklərin həcmi sürətlə artır. Şərq-Qərb marşrutu üzrə yükkeçirmə qabiliyyətini artırmaq üçün Azərbaycan öz milli resursları hesabına böyük həcmdə sərmayə yatıraraq infrastrukturun modernləşdirilməsini və yükaşırma imkanlarının genişləndirilməsini ardıcıl şəkildə davam etdirir. Digər mühüm istiqamət beynəlxalq dəniz portu vasitəsilə yükdaşımaların həcminin artırılmasıdır. Statistik göstəricilər və müəyyən olunan hədəflər onu göstərir ki, çox yaxın vaxtlarda dəniz limanı üzərindən daşınan yüklərin illik həcminin 25 milyon tona çatdırılması planlaşdırılır. Bu kompleks infrastruktur Xəzər dənizi üzərindən daşınan yüklərin aşırma imkanlarını maksimum həddə çatdıracaq”,-deyə deputat bildirib.
Azər Allahverənov gələcəkdə Zəngəzur dəhlizinin açılmasının nəqliyyat şəbəkəsinə yeni və güclü impuls verəcəyinə də diqqət çəkib. O vurğulayıb ki, Zəngəzur dəhlizinin işə düşməsi, Bakı-Tbilisi-Qars xəttinin imkanları və Xəzər dənizindəki tərəfdaş portların Orta Dəhliz üzrə daşımalarını bir neçə dəfə artırmağa imkan verəcək.
Bölmənin digər xəbərləri
