AZƏRBAYCAN BERLİNDƏ KEÇİRİLƏN “BEYNƏLXALQ YAŞIL HƏFTƏ” SƏRGİSİNDƏ İŞTİRAK EDİR
Berlin, 16 yanvar (AZƏRTAC). Yanvarın 15-də Almaniyanın paytaxtı Berlində ənənəvi “Beynəlxalq Yaşıl Həftə” sərgisi açılmışdır. Tədbirdə Azərbaycanı kənd təsərrüfatı naziri İsmət Abasovun rəhbərliyi ilə nümayəndə heyəti təmsil edir.
Yanvarın 24-dək davam edəcək sərgidə ölkəmizin 12 şirkəti Azərbaycan üçün ayrılmış pavilyonda məhsullarını nümayiş etdirmək imkanı qazanmışdır.
Açılış günü sərgi çərçivəsində Azərbaycan ilə bağlı təqdimat mərasimi olmuşdur.
Tədbirdə Azərbaycanın Almaniyadakı səfiri Pərviz Şahbazov respublikanın iqtisadi sahədə uğurlarından danışmış, ölkəmizin bu mötəbər sərgidə artıq üçüncü dəfə iştirak etdiyini bildirmişdir.
Mərasimdə kənd təsərrüfatı naziri İsmət Abasov “Azərbaycanda aqrar sahədə inkişaf və əməkdaşlıq imkanları”, iqtisadi inkişaf nazirinin müavini Niyazi Səfərov “Azərbaycanın iqtisadi inkişafı”, Almaniyanın Qidalanma, Kənd Təsərrüfatı və İstehlakçıların Müdafiəsi Nazirliyi departamentinin rəhbəri German Yeub “Aqrar sahədə Almaniya-Azərbaycan münasibətləri” mövzusunda məruzə etmişlər.
Sonra Azərbaycan incəsənət ustaları konsert proqramı ilə çıxış etmiş, qonaqlara milli mətbəximizin nümunələri təqdim olunmuşdur.
Azərbaycanın “Beynəlxalq Yaşıl Həftə” sərgisində iştirakı Almaniya mətbuatında geniş işıqlandırılmışdır.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
