“AZƏRBAYCAN BEYNƏLXALQ BANKI – MOSKVA”NIN İKİ YAŞI TAMAM OLDU
F.Abdullayev demişdir ki, bank qarşıya qoyduğu vəzifələrin öhdəsindən uğurla gəlir. Ötən il bankın gəliri 20,4 milyon rubl, balansındakı valyuta 813,1 milyon rubl olmuşdur ki, bu da 2002-ci ilin müvafiq dövrünə nisbətən 65 faiz çoxdur. İlkin hesablamalara görə, “ABB-Moskva” 2003-cü ildə kapital qoyuluşundan 6,29 faiz rentabellik əldə etmişdir. Bankın fəaliyyəti, demək olar ki, bütün istiqamətlərdə uğurla inkişaf etmişdir. Belə ki, müxbir bankların hesablarının sayı 85-ə çatmışdır. “ABB-Moskva”nın Rusiyada və xaricdə ən iri tərəfdaş bankları arasında “Sitibank”ı (Nyu-York), “Rayffayzenbank-Avstriya”nı (Vyana), Rusiya Əmanət Bankını, Xarici Ticarət Bankını, Moskva Bankını, “Alfa-Bank”ı, “Menatep- Sankt-Peterburq” bankını və digərlərini göstərmək olar.
İnkişaf etmiş infrastruktur bankın hüquqi şəxslərə geniş maliyyə xidmətləri göstərməsinə imkan verir. Buraya ödəmə-kassa xidməti, biznesin kreditləşdirilməsi və maliyyələşdirilməsinin bütün növləri, qiymətli kağızlarla əməliyyatlar, habelə sənədli və zəmanətli əməliyyatlar daxildir. Korporativ müştərilərə xidmət göstərilməsi işi də banka xeyir gətirir. 2003-cü il dekabrın 31-nə olan məlumata görə, bankda müəssisə və təşkilatların 476 hesabı üzrə xidmət göstərilmişdir (ötən ilin yekunları ilə müqayisədə artım 226 faiz olmuşdur). Bank müştərilərinin hesablarındakı qalıqlar da 8 dəfədən çox artmışdır. “ABB-Moskva” fiziki şəxslər üçün təcili köçürmələr sisteminin inkişafında da xeyli uğur qazanmışdır. Ötən il Azərbaycan ilə Rusiya arasında ümumi məbləği 20,6 milyon ABŞ dollarından artıq olan 20500-dən çox köçürmə əməliyyatı yerinə yetirilmişdir. Xidmətin bu növü üzrə artım 436 faiz təşkil etmişdir.
Bankın idarə heyəti sədrinin sözlərinə görə, ötən il “ABB-Moskva” nizamnamə kapitalından səmərəli istifadə etmiş, habelə kommersiya kreditləşdirilməsi sahəsində fəaliyyətini genişləndirmişdir. Belə ki, ötən ilin sonunadək bank kredit portfelini 10 dəfədən çox artırmışdır. Keçən il banklararası kredit-depozit bazarında, ümumi məbləği 2 milyon ABŞ dolları olan 2 sindisitləşdirilmiş kredit verilməsində iştirak etmişdir.
Bank informasiya texnologiyalarının inkişafı istiqamətində də xeyli səy göstərmiş, 2003-cü ildə yeni proqram təchizatına keçməklə, habelə SWİFT-ə qoşulmaqla informasiya texnologiyalarına xeyli sərmayə qoymuşdur. Bununla yanaşı, kommunikasiya və alternativ rabitə kanalları sistemini də inkişaf etdirmişdir. Bu, bankın 2003-cü ildə Sankt-Peterburqda ilk filialının və Moskvada əməliyyat kassasının açılması ilə əlaqədardır.Sankt-Peterburq filialı ötən ilin ikinci yarısında işə başlamışdır. F.Abdullayevin sözlərinə görə, filial ümumən uğurla fəaliyyət göstərir və 2004-cü ilin ortalarından öz xərcini ödəyəcəkdir. Bankın Moskvadakı əməliyyat kassasında fiziki şəxslər üçün pul köçürmələrinin və valyuta mübadiləsinin həyata keçirilməsi nəzərdə tutulur.
İdarə heyətinin sədri razılıqla bildirmişdir ki, bank 2003-cü ildə Rusiya Banklar Assosiasiyası, Moskva Bank İttifaqı, Moskva Ticarət-Sənaye Palatası, Rusiyadakı ABŞ Ticarət Palatası kimi nüfuzlu və mötəbər təşkilatlarda üzvlük vaxtını uzatmış, habelə Moskvanın hüdudlarından kənarda əməliyyat şəbəkəsini artırmaqla, Regional Banklar Assosiasiyasına üzv qəbul edilmişdir.
F.Abdullayev Azərbaycan Respublikasının Prezidenti İlham Əliyevin Rusiya Federasiyasına ilk rəsmi səfərinin əhəmiyyətini xüsusi vurğulamış, əldə edilmiş razılaşmaların ticarət-iqtisadi əlaqələrin inkişafına yeni təkan verəcəyini bildirmişdir.
Bölmənin digər xəbərləri
