Azərbaycan bu gün dünyada nüfuzlu idman ölkəsi kimi tanınır
Bakı, 10 fevral, AZƏRTAC
Bu gün Azərbaycan dünyada nüfuzlu idman ölkəsi kimi tanınır. Ötən il idmançılarımızın istər ölkə daxilində, istərsə də respublikamızdan kənarda əldə etdikləri uğurlu nəticələr bunu bir daha təsdiqləyir. Bu uğurların nəticəsidir ki, Romada Avropa Olimpiya Komitəsinin Baş Assambleyasında birinci Avropa Oyunlarının 2015-ci ildə Bakıda keçirilməsi haqqında qərar 38 dövlətin dəstəyi ilə qəbul edildi. Güclü rəqabətin olmasına baxmayaraq, 42 ölkədən 38-nin Azərbaycana səs verməsi nəticəsində oyunlara ev sahibliyi etmək hüququ Bakıya verildi.
Bu sözləri Yeni Azərbaycan Partiyası Gənclər Birliyi (YAP GB) Ofisinin əlaqələndiricisi Elmar Məmmədov AZƏRTAC-a müsahibəsində deyib.
O bildirib ki, ilk Avropa Oyunlarının 2015-ci ildə Bakıda keçirilməsi ilə bağlı qərar Azərbaycan dövlətinin yürütdüyü idman siyasətinə dünyada göstərilən etimadın təzahürüdür. Heç şübhəsiz ki, ölkəmiz bu sınaqdan da uğurla çıxacaq və idman dövləti kimi statusunu daha da möhkəmləndirəcək. Müstəqilliyini bərpa edəndən bu günədək Azərbaycan idmançıları müxtəlif səviyyəli beynəlxalq yarışlarda minlərlə medal əldə ediblər. Bütün bunlar qazanılan uğurlardan, tarixi nailiyyətlərdən xəbər verir. Bu isə ölkəmizin idman sahəsində uğurlarının, dövlətin bu sahəyə qayğısının nəticəsidir.
E.Məmmədov vurğulayıb ki, Azərbaycan mötəbər idman tədbirlərinə uğurla ev sahibliyi edir. Bu tədbirlərin Azərbaycanda keçirilməsi üçün ölkəmizdə təşkilati baxımdan da yüksək şərait və imkan var. Bunu dünya idman təşkilatları təsdiqləyir və bu səbəbdən də bu yarışlar ölkəmizdə reallaşır. Bu gün dövlətimizin idman sahəsinə qoyduğu sərmayələr, göstərdiyi diqqət ölkəmizdə idmanın kütləviliyinin artmasına, gəncliyin sağlam inkişafını təmin edir. İdmançıların qazandıqları qələbələr, əslində möhkəm təmələ əsaslanır. Yəni, onların dünyanın idman arenalarında əldə etdikləri bu qələbələrin arxasında güclü Azərbaycan dövləti dayanır. Dövlətin inkişafı, iqtisadiyyatın daha da güclənməsi, möhkəm dayaqlara əsaslanması idmanın da inkişafında həlledici rol oynayır.
E.Məmmədov əminliklə söyləyib ki, Avropa Oyunlarının 2015-ci ildə Bakıda keçirilməsi ilə bağlı qərar Avropada, dünyada Azərbaycanın nüfuzunu daha da artıracaq və respublikamız Avropa Oyunlarına ev sahibliyi edən ilk ölkə kimi tarixə düşəcək. Ev sahibliyi Azərbaycan xalqının böyük qələbəsi olmaqla yanaşı, həm də böyük məsuliyyətdir. İnanıram ki, Avropa Oyunları Azərbaycanın dünya idmanına töhfəsi kimi qiymətləndiriləcək və ölkəmizin imici üçün, beynəlxalq miqyasda daha çox tanınması baxımından vacib hadisə olacaq.
Bölmənin digər xəbərləri
