Azərbaycan dəmiryolçuları İstanbulda keçirilən Multimodal Nəqliyyat və Logistika Forumunda təqdimatlarla çıxış ediblər
Bakı, 15 sentyabr, AZƏRTAC
İstanbulda Türk Dövlətləri Təşkilatının (TDT) himayəsi altında təşkilata üzv dövlətlərin dəmir yolu administrasiyaları, TRASEKA Hökumətlərarası Komissiyasının Daimi Katibliyi, “MFA Logistics” və digər tərəfdaşlarla əməkdaşlıq çərçivəsində Multimodal Nəqliyyat və Logistika Forumu keçirilib.
AZƏRTAC TRASEKA-nın məlumatına istinadla xəbər verir ki, iki gün davam edən forum aparıcı nəqliyyat və logistika şirkətlərinin, biznes assosiasiyalarının, beynəlxalq təşkilatların və regionun müvafiq maraqlı tərəflərinin nümayəndələrini bir araya gətirərək, müxtəlif nəqliyyat növləri ilə yüklərin beynəlxalq daşınması məsələsi üzrə fikir və təcrübə mübadiləsinə imkan yaradıb.
Türkiyə Respublikasının nəqliyyat və infrastruktur naziri Abdulkadir Uraloğlu və TDT-nin Baş katibi Kubanıçbek Ömurəliyev forum iştirakçılarını salamlayıblar.
Forumda dəmir yolu daşımaları, multimodal nəqliyyat dəhlizlərinin inkişafı, biznesin cəlb edilməsi, həmçinin multimodal daşımaların hüquqi aspektlərinə xüsusi diqqət yetirilib.
Dördüncü sessiyada çıxışı zamanı TRASEKA Hökumətlərarası Komissiyasının Daimi Katibliyinin baş katibi Aset Asavbayev multimodal nəqliyyatın inkişafı və nəqliyyat əlaqələrinin təmin edilməsi üçün şəraiti təmin edən hüquqi normaların əhəmiyyətini vurğulayıb, həmçinin bu istiqamətdə görülən işlər barədə iştirakçılara məlumat verib. O qeyd edib ki, bu fəaliyyətlər həm Daimi Katiblik, həm də iştirakçı ölkələr tərəfindən istiqamətləndirilir.
Çıxışını yekunlaşdıran baş katib bildirib ki, “dünyada dəyişən geosiyasi vəziyyəti nəzərə alaraq, TRASEKA ölkələri ilə Türk Dövlətləri Təşkilatı arasında multimodal nəqliyyatın inkişafı hüquqi tənzimləmənin bütün zəruri ilkin şərtlərinin yarandığı Avropa və Asiya arasında ticarət üçün münbit şəraitin təmin edilməsində mühüm əhəmiyyət kəsb edir. O əlavə edib: “Əminəm ki, birgə səylərlə regionda daşımaların rəqabət qabiliyyətinin artırılmasına mühüm töhfə vermək olar ki, bu da yük axınlarının və yüklərin sərbəst tranzitinə tələbatın yenidən istiqamətləndirilməsi mərhələsində çox vacibdir”.
Qeyd edək ki, bu tədbir Orta və Cənub dəhlizləri boyunca multimodal nəqliyyat marşrutlarının inkişafına xüsusi diqqət yetirməklə, əməkdaşlığın təşviqi, tərəfdaşlıq əlaqələrinin gücləndirilməsi və qlobal təchizat zəncirlərinin səmərəliliyinin, davamlılığının və dayanıqlığının artırılmasına yönəlib.
TRASEKA və TDT tərəfindən birgə təşkil olunmuş 5-ci sessiyaya Aset Asavbayev moderatorluq edib. Bu sessiyanın məruzəçiləri - Türk İnvestisiya Fondunun, Qara Dəniz İqtisadi Əməkdaşlıq Təşkilatının, Beynəlxalq Avtomobil Nəqliyyatı İttifaqının, Beynəlxalq Nəqliyyat Diplomatiyası Mərkəzinin, eləcə də Azərbaycanın nümayəndələri regional əlaqəni təmin etmək üçün yeni imkanlarla bağlı təqdimatlarla çıxış edib və müzakirələrə qatılıblar.
Forum çərçivəsində, həmçinin TDT ölkələri dəmir yolu administrasiyaları rəhbərlərinin ikinci görüşü, həmçinin şirkətlər arasında sazişlərin və anlaşma memorandumlarının imzalanması mərasimi təşkil olunub.
Bölmənin digər xəbərləri
