Azərbaycan filmi Antalya Beynəlxalq Film Festivalında müsabiqə proqramına daxil edilib
Bakı, 4 sentyabr, AZƏRTAC
Azərbaycanın Əməkdar incəsənət xadimi Elçin Musaoğlunun “Məryəm” bədii filmi bu il oktyabrın 5-dən 15-dək Antalyada keçiriləcək “Altın Portakal” Beynəlxalq Film Festivalının müsabiqə proqramında təqdim olunacaq.
Bu barədə AZƏRTAC nüfuzlu festivalının rəsmi saytına istinadla xəbər verir.
Film uzun illər vəfat etmiş hesab etdiyi atası ilə görüşmək məqsədilə Azərbaycana gələn qızın təsirli hekayəsindən bəhs edir. Qəhrəman həyatını kökündən dəyişdirən və həmin ana qədər bildiyi hər şeyi yenidən düşünməyə vadar edən bir həqiqətlə qarşılaşır.
Filmin istehsalı Azərbaycan Respublikası Mədəniyyət Nazirliyinin dəstəyi ilə “Azərbaycanfilm” kinostudiyasının, Türkiyənin TRT telekanalının və “Sinema evi” studiyasının birgə əməkdaşlığı ilə həyata keçirilib.
Türkiyənin ən əhəmiyyətli və ən böyük film festivallarından biri olan “Altın Portakal” festivalı dünyanın hər yerindən kino sənətinin ən yaxşı əsərlərinə diqqət çəkir. “Məryəm” filminin bu festivalda iştirakı Azərbaycan kinosunun beynəlxalq aləmdə tanınmasını vurğulayır və ölkələr arasında mədəni mübadiləni təşviq edir.
Bölmənin digər xəbərləri
