Azərbaycan gimnastı: Bakıda Olimpiya lisenziyası qazanmaqla adımı tarixə yazmaq istəyirəm
Bakı, 22 fevral , AZƏRTAC
“Dünya Kubokuna qısa müddət qaldığından məşqlərimiz daha da çətinləşir və intensivlik artır”.
AZƏRTAC xəbər verir ki, bu sözləri batut gimnastikası və tamblinq üzrə milli komandanın üzvü Selcan Mahsudova Bakıda keçiriləcək Dünya Kubokuna hazırlıq barədə Azərbaycan Gimnastika Federasiyasının mətbuat xidmətinə açıqlamasında deyib.
Dünya Kubokunun gümüş mükafatçısı hazırda çox yaxşı formada olduğunu bildirib: “Fiziki məşqlərlə gücümüzü artırdıq. Ümid edirəm ki, hər şey yaxşı olacaq. Gimnastika ilə məşğul olmağa başladığım ilk gündən ən böyük arzum bu idman növündə Olimpiya Oyunlarına lisenziya qazanmaq olub. Adımı tarixə yazmaq istəyirəm. Bakıdakı turnirə hazırlaşmaqda da əsas məqsədim məhz Olimpiadaya lisenziya əldə etməkdir. Doğma arenada çıxış etmək həm həyəcanlı, həm də məsuliyyətli hissdir. İnanıram ki, azarkeşlərin, ailəmin, dostlarımın və komandamın dəstəyi yaxşı çıxış etməyimə kömək olacaq”.
Qeyd edək ki, batut gimnastikası və tamblinq üzrə Dünya Kuboku fevralın 23-25-də Milli Gimnastika Arenasında təşkil olunacaq.
Bölmənin digər xəbərləri
