AZƏRBAYCAN “İDEYAMIZ VARDIR” BEYNƏLXALQ ELMİ YARADICI GƏNCLƏR FESTİVALININ KEÇİRİLMƏSİ TƏŞƏBBÜSÜ İLƏ ÇIXIŞ ETMİŞDİR
Bakı, 7 iyul (AZƏRTAC). MDB İcraiyyə Komitəsinin (İK) sədri-icraçı katib Sergey Lebedev İK-nın mətbuat xidmətinə müsahibə vermişdir. Müsahibədə MDB ölkələrinin gənclər siyasəti sahəsində əməkdaşlığı məsələlərinə toxunulmuşdur.
AZƏRTAC həmin müsahibənin mətnini oxuculara təqdim edir.
- Sergey Nikolayeviç, Birlik ölkələrinin gənclər siyasəti sahəsində qarşılıqlı fəaliyyəti haqqında nə deyə bilərsiniz?
- Bu sahədə qarşılıqlı fəaliyyətimiz MDB ölkələri gənclərinin yaxınlaşmasına və onların dostluğunun möhkəmlənməsinə, gənclərin sosial baxımdan dəstəklənməsinə, cəmiyyətin sosial-iqtisadi, siyasi və mədəni həyatına daha fəal qoşulmalarına yönəldilmişdir. Baza prinsiplərindən biri gənclərə və bütövlükdə cəmiyyətə, onların yaradıcı təşəbbüsünün inkişafına dair siyasətin və ayrı-ayrı proqramların hazırlanmasında və həyata keçirilməsində gənc vətəndaşların bilavasitə iştirakını təmin etməkdir.
Birliyin hər bir ölkəsi qarşısına öz hüquq və öhdəliklərini bilən, qanunlara riayət edən, düzgün, müstəqil seçim etməyə və buna görə məsuliyyət daşımağa qadir vətənpərvər, eyni zamanda beynəlmiləlçi gənclər tərbiyə etmək məqsədi qoyur. Milli gənclər proqramlarının prinsipcə oxşarlığı MDB-nin üzvü olan ölkələrin gənclərinin beynəlxalq əməkdaşlığının vahid strategiyasının hazırlanmasına imkan vermiş və bunu tələb etmişdir. Sənədin Belarus Respublikasının Təhsil Nazirliyi tərəfindən hazırlanmış layihəsinə Gənclərin İşləri üzrə Şuranın iyulun 3-4-də Düşənbədə keçirilən iclasında baxılmışdır.
Deməliyəm ki, Gənclərin İşləri üzrə Şura MDB məkanında uğurlu fəaliyyət göstərən sahə əməkdaşlığı orqanlarından biridir. Şuranın iclaslarında reallaşdırılması baxımından bütün ölkələr üçün əhəmiyyətli olan gənclər siyasəti məsələləri müzakirə olunur və gənclərlə iş, gənclər siyasətinin kadrla təminatı, çoxsaylı tədbirlərin keçirilməsi sahəsində qanunvericiliyin təkmilləşdirilməsi üzrə konkret qərarlar qəbul edilir.
Dünya maliyyə böhranı şaraitində gənclərin iqtisadi baxımdan dəstəklənməsi məsələləri xüsusi əhəmiyyət kəsb edir. Ona görə də Şuranın bu ilin əvvəlində keçirilmiş iclasında gənclərin əmək məşğulluğunun təşkili problemi müzakirə olunmuşdur. Düşənbədə keçirilən iclas isə ağır həyat şəraiti olan gənclərlə iş təcrübəsinin müzakirəsinə həsr edilmişdi.
Şura üzvləri 2009-cu ildə MDB-nin üzvü olan ölkələrdə Gənclər ilinin keçirilməsi planı layihəsinin hazırlanmasında yaxından iştirak etmişlər.
Yaxın aylarda Birliyin bütün ölkələrində əsas tədbirlər vətənpərvərlik mövzusunda, ilk növbədə 1941-1945-ci illər müharibəsində Qələbənin 65-ci ildönümünə həsr olunmuş tədbirlər olacaqdır. Ölkələrimizin gəncləri Beynəlxalq Xatirə Növbəsində, “Biz Böyük Qələbənin varisləriyik” beynəlxalq aksiyasında, “Böyük Qələbənin şöhrəti naminə” vətənpərvərlik aksiyasında, kadet siniflərində təhsil alanlar üçün “Vətənin şərəfi naminə” vətəndaş vətənpərvərliyi növbəsinin keçirilməsində, 2-ci dünya müharibəsində itkin düşmüş əsgər və zabitlərin, onların dəfn olunduqları yerlərin axtarışı, abidələrin bərpası və qardaşlıq məzarlarına qulluq edilməsi aksiyalarında iştirak edirlər.
Gənclər ilinin ikinci istiqaməti gənclərin ideya və təşəbbüslərini Birlik dövlətləri üçün aydın və faydalı etməkdir.
Məsələn, Azərbaycan Respublikası “İdeyamız vardır” elmi-yaradıcı festival, Belarus Respublikası “Açıq layihə - gənclərin əməkdaşlığı” beynəlxalq forumu, Qırğızıstan Respublikası isə gənc alimlər üçün “Gələcəyin enerji resursları”konfransını keçirməyi təklif etmişdir.
Rusiya Federasiyasının təşəbbüsü ilə gənclərin və yeniyetmələrin ixtiralarından ibarət “Gənclərin elmi-texniki yaradıcılığı-2009” sərgi-forumu, “Lomonosov-2009” beynəlxalq gənclər elmi forumu, II Sankt-Peterburq Beynəlxalq gənclər festivalı plana daxil edilmişdir.
Gənclər ilində MDB çərçivəsində gənclər üçün maraqlı informasiyanın alınması və mübadiləsi imkanlarının genişləndirilməsi nəzərdə tutulur.
MDB İcraiyyə Komitəsinin saytında Gənclərin İşləri üzrə Şuranın informasiya səhifəsi yaradılmışdır. Burada gənclər siyasəti sahəsində milli qanunvericiliklər, gənclərin işləri üzrə dövlət orqanlarının, ictimai gənclər təşkilatlarının strukturu haqqında məlumatlar əldə etmək, onların rəsmi saytlarına istinadlar, xəbərlər lenti ilə tanış olmaq, habelə MDB ölkələrində keçirilən əhəmiyyətli gənclər tədbirləri haqqında informasiya almaq mümkündür. Ümidvarıq ki, MDB İcraiyyə Komitəsinin internet portalının yaradılması Birlik ölkələri gənclərinin ünsiyyət saxlamaları üçün geniş imkanlar açacaqdır.
Zənnimcə, hamımız belə bir konseptual anlayışı rəhbər tutmalıyıq ki, gənclər problem mənbəyi deyildir, onların dəstəklənməsi və təşəbbüslərinə diqqət yetirilməsi şərti ilə ictimai inkişafda və dövlətin inkişafında əhəmiyyətli resursdur.
Bölmənin digər xəbərləri
