Azərbaycan idmançıları Gürcüstanda keçiriləcək Gənclərin Qış Olimpiya Festivalında iştirak edəcəklər
Tbilisi, 1 fevral, AZƏRTAC
Fevralın 9-dan 16-dək Gürcüstanda “Bakuriani 2025” Gənclərin Avropa Qış Olimpiya Festivalı keçiriləcək.
AZƏRTAC xəbər verir ki, festivalda 42 ölkədən 1000-ə yaxın idmançının iştirakı gözlənilir.
Festivalın təşkilat komitəsindən AZƏRTAC-a bildirilib ki, beynəlxalq yarışa Azərbaycan idmançıları da dəvət olunublar və onlar festivalda iştirak edəcəklər.
Gürcüstan hökumətinin mətbuat xidmətindən verilən məlumata görə, ölkə festivalı yüksək səviyyədə keçirməyə hazırdır və müvafiq infrastruktur hazırlanıb. O cümlədən, Tbilisidə beynəlxalq standartlara cavab verən buz arenası açılıb. Bakurianidə isə 3,5 km uzunluğunda biatlon və kros trası açılacaq.
Festivalda iştirak edəcək ilk nümayəndə heyətləri fevralın 4-də Gürcüstana səfər edəcək, 2 gün sonra isə buzüstü hokkey üzrə ilk yarışın keçirilməsi planlaşdırılır.
Qeyd edək ki, “Bakuriani 2025” çərçivəsində Tbilisi, Batumi və Bakurianidə qış idmanının səkkiz növü üzrə yarışlar keçiriləcək.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
