AZƏRBAYCAN İDMANÇILARI PEKİN YAY OLİMPİYA OYUNLARINDA ÖLKƏMİZİ LAYİQİNCƏ TƏMSİL EDƏCƏKLƏR
AZƏRTAC xəbər verir ki, bu sözləri iyulun 18-də Yeni Azərbaycan Partiyasının qərargahında mətbuat konfransı keçirən gənclər və idman naziri Azad Rəhimov demişdir.
Nazir Azərbaycanda bütün sahələrdə olduğu kimi, idmanda da böyük irəliləyişin baş verdiyini, ölkəmizdə bir çox beynəlxalq yarışların yüksək səviyyədə keçirildiyini xüsusilə qeyd etmişdir. Prezident İlham Əliyevin göstərişi ilə respublikamızın bir çox bölgələrində olimpiya idman komplekslərinin tikilməsini diqqətə çatdıran natiq, bu istiqamətdə işlərin cari ildə də davam etdiriləcəyini vurğulamışdır.
Azad Rəhimov vurğulamışdır ki, Azərbaycan yalnız idman nailiyyətləri ilə deyil, həm də mötəbər yarışların təşkili sahəsindəki uğurları ilə də tanınır və bunun bariz nəticəsidir ki, 2007-ci ildə ölkəmizdə 36 beynəlxalq turnir keçirilmişdir. Artıq bir çox beynəlxalq idman qurumları dünya səviyyəli yarışların Azərbaycanda təşkilinə tərəddüd etmədən razılıq verirlər. Bu, Azərbaycanın etibarlı tərəfdaş kimi qəbul edilməsinin göstəricisidir.
Gənclər və idman naziri bildirmişdir ki, bu gün Azərbaycan idmançıları Pekin Yay Olimpiya Oyunlarına hazırlaşır. İnanıram ki, idmançılarımız bu möhtəşəm turnirdə ölkəmizi layiqincə təmsil edəcəklər və qazandıqları qələbələrlə hamımızı sevindirəcəklər.
######
 |
 |
Bölmənin digər xəbərləri
