AZƏRBAYCAN İLƏ GÜRCÜSTAN ARASINDA MAL DÖVRİYYƏSİ İLDƏN-İLƏ ARTIR
Aydın Əliyev tarixi köklərə əsaslanan Azərbaycan Gürcüstan əlaqələrinin hazırkı vəziyyətindən söhbət açmış, iki dost ölkə arasında siyasi, mədəni, iqtisadi sahədə əməkdaşlıq münasibətlərini yüksək qiymətləndirmişdir.
Sədr bildirmişdir ki, xalqımızın ümummilli lideri Heydər Əliyevin gərgin əməyi, uzaqgörən siyasəti ölkələrimiz arasında əlaqələri daha da möhkəmlətmişdir və bu siyasət Prezident İlham Əliyev tərəfindən uğurla davam etdirilir. Aydın Əliyev xalqlarımızın firavan gələcəyinə yönələn, dünyanın ən iri layihələrindən biri olan Bakı-Tbilisi-Ceyhan neft ixrac boru kəmərinin istismara verilməsinin məhz ulu öndərin adı ilə bağlı olduğunu xatırlatmışdır. Bakı-Tbilisi-Ərzurum qaz kəmərinin yaxın zamanlarda istifadəyə veriləcəyini, daha bir böyük layihənin - Qars-Axalkalaki-Tbilisi-Bakı dəmir yolu xəttinin gerçəkləşdirilməsi istiqamətində işlərin uğurla davam etdirildiyini sevindirici hal kimi səciyyələndirən DGK sədri bu irimiqyaslı layihələrin də hər iki ölkənin prezidentləri İlham Əliyev və Mixail Saakaşvilinin səyləri nəticəsində həyata keçəcəyinə umidvar olduğunu söyləmişdir.
Ticarət-iqtisadi münasibətlərə gəlincə, Aydın Əliyev qeyd etmişdir ki, son illərin statistikası ölkələrimiz arasında mal dövriyyəsinin artdığını göstərir və bu istiqamətdə birgə səylərimizi daha da gücləndirməliyik.
Azərbaycanla Gürcüstanın gömrük qurumları arasında mövcud əməkdaşlıq əlaqələrinə toxunan sədr, ümumiyyətlə, hər iki ölkədə aparılan iqtisadi islahatların müsbət nəticələrindən danışmış, iqtisadi-ticarət əlaqələrinin inkişafında gömrük xidmətinin də üzərinə mühüm vəzifələrin düşdüyünü bildirmişdir. Məhz buna görə də hər iki ölkənin uyğun qurumları arasında əməkdaşlığın daha da genişləndirilməsi zəruriliyini qeyd edən komitə sədri mütəmadi görüşlərin keçirilməsinin, məsləhətləşmələr, təcrübə mübadiləsi aparılmasının ümumi işə töhfə verdiyini vurğulamışdır.
İrakli Çoqovadze ölkəmizə səfərindən məmnunluğunu ifadə etmiş, Azərbaycanda hərtərəfli inkişafın şahidi olduğunu söyləmişdir.
Azərbaycanla Gürcüstan arasındakı mövcud münasibətlərin dostluq, qardaşlıq ənənələrinə söykəndiyini deyən nazir hər iki ölkə başçısının səyləri ilə bütün sahələr üzrə genişlənən əməkdaşlığın inkişaf tendensiyasından söhbət açmışdır.
İqtisadi sahədə əlaqələrə toxunan qonaq ölkələrimizin irəliyə doğru inkişaf sürətinə nəzər salmış, əməkdaşlığın daha da möhkəmləndirilməsinin zəruriliyini vurğulamış, iqtisadi-ticarət münasibətlərində mühüm rol oynayan gömrük orqanları arasında qarşılıqlı əməkdaşlığın hazırkı vəziyyətini yüksək qiymətləndirmişdir.
Gürcüstanın ölkəmizdəki səfiri Zurab Qumberidzenin iştirak etdiyi görüşdə, həmçinin tranzit daşımaları ilə bağlı məsələlər, əməkdaşlığın perspektivləri müzakirə edilmişdir.
Bölmənin digər xəbərləri
