Azərbaycan-İran münasibətləri: yeni siyasi və mədəni birgəliyin başlanğıcı
Bakı, 29 aprel, AZƏRTAC
Bu gün Azərbaycan regionun güclü dövlətlərindən biridir. İran İslam Respublikasının Prezidenti Məsud Pezeşkianın 2025-ci il aprelin 28-də Azərbaycana səfəri ölkəmizin, eləcə də regionun maraqları baxımından strateji əməkdaşlıq üfüqləri vəd edir. Azərbaycanın belə aktiv bir mövqe sərgiləməsi ümumən regionun rifahı üçün əhəmiyyətlidir.
Bu fikirləri AZƏRTAC-a açıqlamasında Milli Məclisin deputatı, filologiya elmləri doktoru Elnarə Akimova söyləyib. Bu səfərin tarixi əhəmiyyətini və siyasi perspektivini Prezident İlham Əliyevin mətbuata bəyanatında ifadə etdiyini deyən deputat dövlətimizin başçısının çıxışından bu sitatı gətirib: “Çalışacağıq ki, gələcək üçün geniş, əhatəli və daha yaxşı strateji planımız olsun. Bütün sahələrdə - sənaye, elm, mədəniyyət, iqtisadiyyat, siyasət, təhlükəsizlik üzrə planlarımız olsun. Biz birlikdə bölgədə sülh, təhlükəsizlik və əmin-amanlığı təmin edəcəyik və öz çətinliklərimizi həll edəcəyik”.
İki ölkənin yaxın qonşu olduğunu qeyd edən deputat deyib: “İranla yaxın qonşuyuq, bizi hətta qohumluq əlaqələri birləşdirir. Azərbaycanın varlığı, ölkəmizin qlobal dünya düzənində balanslaşdırılmış siyasət yürütməsi regionda və dünyada geosiyasi sabitliyi təmin edən əsas amildir. Bu mənada səfərin tarixi əhəmiyyətini həssaslıqla dəyərləndirməliyik. Bunu Azərbaycan Respublikasının Prezidenti İlham Əliyev İran İslam Respublikasının Prezidenti Məsud Pezeşkianın aprelin 28-də Azərbaycana səfəri zamanı mətbuata verdiyi bəyanatda da açıqladı. Dövlətimizin başçısı bəyanatında çox önəmli məsələlərə vurğu saldı. Azərbaycan ilə İran strateji münasibətlərin gələcəkdə hansı yüksələn xətlə inkişaf edəcəyinin hərəkət trayektoriyasını imzalanan sənədlər əsasında əyaniləşdirdi. Bu, hər iki ölkənin bir-birinə olan xoş münasibətinin təzahürü sayılmalıdır”.
Elnarə Akimovanın sözlərinə görə, Azərbaycanla İran hazırda beynəlxalq təşkilatlar çərçivəsində də bir-birini dəstəkləyir. BMT, İslam Əməkdaşlıq Təşkilatı, İqtisadi Əməkdaşlıq Təşkilatı, Qoşulmama Hərəkatı və digər təşkilatlar çərçivəsində hər iki ölkə daim bir-birinin yanındadır. Qarşılıqlı əməkdaşlığın inkişafında Prezidentin açıqladığı məqamlar əsas prioritetdir: “Həm regional təhlükəsizlik məsələləri önəmli rol oynayır, eyni zamanda, çoxtərəfli əməkdaşlıq üçün gözəl şərait var. Təbii olaraq bizim ticarət əlaqələrimizin inkişafı ilə bağlı konkret göstərişlər verildi. Nümayəndə heyətlərinin iştirakı ilə keçirilən görüş də çox məhsuldar olmuşdur. Yəni, məramımız, məqsədimiz birdir - Azərbaycan-İran dövlətlərarası əlaqələrini yüksək səviyyəyə qaldırmaqdır”.
“Əlbəttə ki, İran İslam Respublikasının Prezidenti Məsud Pezeşkianın Azərbaycana səfəri iki ölkə arasında münasibətləri daha axarlı, daha nizamlı müstəviyə gətirəcək, qəbul edilmiş qərarlar bizim əlaqələrimizi uzun illər bundan sonra yüksələn xətlə irəli aparacaq”, - deyə müsahibimiz bildirib.
Deputat vurğulayıb ki, Prezident İlham Əliyevin öz bəyanatında məhz mədəni əlaqələrə önəm verməsi vacib məqamlardan sayılmalıdır: “Çünki bütün digər əlaqələrlə yanaşı, mədəniyyət, ədəbiyyat, humanitar düşüncə sahəsində qurulan birliklər əsrlərdən-əsrlərə körpü ola bilir. Bu gün Azərbaycan ilə İran mədəniyyətini birləşdirən nə qədər ortaq dəyərlər, ortaq keçmiş var. Bu dəyərlərə söykənərək, daha perspektiv düşüncə çevrəsi yaratmaq, dövlətimizin siyasi sahədə yaratdığı harmoniya və ahəngi mədəni sferaya daşımaqla birgəliyimizə daha təməlli, daha dinamik kontekst qazandıra bilərik”.
Bölmənin digər xəbərləri
