Azərbaycan klubları avrokuboklarda yeni rekorda imza atıblar
Bakı, 17 iyul, AZƏRTAC
Azərbaycan klubları avrokuboklarda yeni rekorda imza atıblar.
AZƏRTAC xəbər verir ki, mübarizəyə I təsnifat mərhələsindən başlayan “Sabah”, “Qarabağ” və “Zirə” hər iki görüşlərini qələbə ilə başa vurublar. Topların nisbəti isə 16:1-dir.
İlk raundda “Sabah” Çempionlar Liqasında Uelsin TNS klubunu (2:0, 2:1), “Qarabağ” İslanadiyanın “Vestri” kollektivini (hər iki oyunda 3:0), “Zirə” isə Gürcüstanın “Torpedo” komandasını (hər iki matçda 3:0) məğlub edib.
Bu, Azərbaycan futbolunun tarixində avrokubokların bir mərhələsində qazanılan ən çox qələbə sayıdır. Buna qədər ən yaxşı göstərici 2017-2018-ci illər mövsümündə qeydə alınıb. Həmin vaxt Azərbaycan təmsilçiləri 2 raundda ümumilikdə 6 qalibiyyət əldə etmişdilər.
“Sabah”, “Qarabağ” və “Zirə”nin uğurlu nəticələri Azərbaycanı bu göstərici üzrə Avropada zirvəyə yüksəldib. Belə ki, Azərbaycan bu mövsüm avrokuboklarda mübarizəyə start verən 33 ölkə arasında qələbə sayına görə liderdir.
Beləliklə, I təsnifat mərhələsindən sonra Azərbaycanın UEFA reytinqində qazandığı əmsal 1,500-ə çatıb. Ölkəmiz 20,062 reytinq xalı ilə 26-cı pillədə yer alıb.
Bölmənin digər xəbərləri
