Azərbaycan mədəniyyətinin Özbəkistanda təbliğinə görə “Avto Radio” teleradiosu təltif edilib
Təqdimat Daşkənddə “Renessans” milli mükafatının təqdimatı çərçivəsində keçirilib
Bakı, 11 dekabr, AZƏRTAC
Daşkənddə Özbəkistan Milli Media Birliyinin təşkilatçılığı ilə “Renessans” milli mükafatının növbəti təqdimetmə mərasimi keçirilib. Ənənəvi olaraq bu tədbir ölkənin aparıcı media qurumlarını, jurnalistləri, dövlət və ictimai qurumların nümayəndələrini bir araya gətirir və il ərzində informasiya məkanının inkişafına töhfə verən layihələri qiymətləndirmək məqsədi daşıyır.
Bu barədə AZƏRTAC-a Özbəkistandakı Heydər Əliyev adına Azərbaycan Mədəniyyət Mərkəzindən məlumat verilib.
Tədbiri Özbəkistan Milli Media Birliyinin sədri, Jurnalistika və Kütləvi Kommunikasiyalar Universitetinin rektoru professor Şerzodxon Qudratxoja açaraq, media sahəsində ilboyu fədakar fəaliyyət göstərən yaradıcı insanların əməyinin tanınmasının, onların dürüst və açıq sözünün qiymətləndirilməsinin, həmçinin jurnalistikanın cəmiyyətdəki rolunun bir daha diqqətə çatdırılmasının vacibliyini vurğulayıb.
Mərasim çərçivəsində “Ən yaxşı səhər teleşousu”, “Ən yaxşı mədəni-maarifçi layihə”, “Ən yaxşı xəbər televiziya proqramı”, “Ən yaxşı ictimai-siyasi televiziya layihəsi”, “İlin ən yaxşı teleserialı” kimi əsas nominasiyalar üzrə, eləcə də müxtəlif regional və ixtisaslaşmış kateqoriyalar üzrə qaliblər elan edilərək mükafatlandırılıblar.
Tədbirdə Özbəkistandakı Heydər Əliyev adına Azərbaycan Mədəniyyət Mərkəzi “Azərbaycan mədəniyyətinin təbliği üzrə peşəkar media tərəfdaşlığındakı fəaliyyətinə görə” xüsusi nominasiyası üzrə “Avto Radio” teleradiosunu təltif edib.
Mərkəzin direktoru Akif Marifli çıxışında Mədəniyyət Mərkəzinin Özbəkistan mediası ilə çoxillik peşəkar əməkdaşlığından, “Avto Radio”nun efirində Azərbaycan mövzusuna həsr olunan verilişlərin, süjetlərin və layihələrin müntəzəm təqdim olunmasından bəhs edib, media sahəsində bu əməkdaşlığın Azərbaycan və Özbəkistan xalqları arasında dostluq münasibətlərinin möhkəmlənməsinə xidmət etdiyini qeyd edib.
Tədbir çərçivəsində “Avto Radio”ya fəxri sertifikat və pul mükafatı təqdim olunub, həmçinin Mərkəzin hər il təşkil etdiyi Azərbaycana mediaturda iştirak imkanı verilib.
Mərasim tanınmış sənətçilərin çıxışları və konsert proqramı ilə yekunlaşıb.
Bölmənin digər xəbərləri
