Azərbaycan Milli Elmlər Akademiyası Ədəbiyyat İnstitutunun beynəlxalq əlaqələri genişlənir
Bakı, 5 noyabr (AZƏRTAC). Azərbaycan Milli Elmlər Akademiyası (AMEA) Nizami Gəncəvi adına Ədəbiyyat İnstitutunda Almaniyanın Humboldt Universitetinin Azərbaycan tarixi kafedrasının müdiri, professor Eva Mariya Aux ilə görüş olmuşdur.
Akademiyadan AZƏRTAC-a bildirmişlər ki, görüşdə AMEA-nın vitse-prezidenti, Ədəbiyyat İnstitutunun direktoru vəzifəsini icra edən, akademik İsa Həbibbəyli Azərbaycan ilə Almaniya arasında elmi əlaqələrin perspektivləri barədə söhbət açmışdır.
İ.Həbibbəyli rəhbərlik etdiyi institutun yaranma tarixi, elmi istiqamətləri haqqında ətraflı məlumat vermiş, elmi müəssisələr arasında birgə əməkdaşlıq əlaqələrinin hər iki ölkə üçün faydalı olacağını qeyd etmişdir.
Professor Eva Mariya Aux təmsil etdiyi universitet ilə Ədəbiyyat İnstitutunun qarşılıqlı elmi əlaqələrinin yaradılmasından məmnunluğunu ifadə etmişdir.
Sonra AMEA-nın Ədəbiyyat İnstitutu ilə Almaniyanın Humboldt Universiteti arasında qarşılıqlı əməkdaşlıq haqqında müqavilə imzalanmışdır.
Qeyd edək ki, bu sənəd Ədəbiyyat İnstitutunun fəaliyyəti dövründə imzalanan ilk beynəlxalq müqavilədir.
Bölmənin digər xəbərləri
