Azərbaycan millisinin baş məşqçisi: Seçmə mərhələnin oyunlarının Bakıda keçirilməsi əlavə stimuldur
Bakı, 6 mart, AZƏRTAC
“İlk oyundakı rəqibimiz Lüksemburq artıq bizə tanışdır. Ötən Avropa çempionatının seçmə mərhələsində onlarla qarşılaşmışdıq. Həmin matçı təhlil etdik və səhvlərimizin üzərində işlədik. Bu dəfə daha yaxşı çıxış etməyə çalışacağıq”.
AZƏRTAC xəbər verir ki, bu sözləri 17 yaşadək qadın futbolçulardan ibarət Azərbaycan milli komandasının baş məşqçisi Nərgiz Qurbanova martın 12-18-də Bakıda təşkil olunacaq Avropa çempionatının II seçmə mərhələsinin qrup oyunları barədə AFFA-nın saytına açıqlamasında deyib.
Mütəxəssis qrupun favoritinin Bolqarıstan yığması olduğunu bildirib: “Çünki onlar sonuncu dəfə A Liqasında çıxış edib, Fransa kimi komanda ilə heç-heçəyə nail olublar. Həmçinin Malta da yaxşı rəqibdir. Qrupumuzdakı hər üç matça ciddi hazırlaşmaq lazımdır”.
Onun sözlərinə görə, oyunların Bakıda keçirilməsi milli komanda üçün əlavə stimuldur: “Öz azarkeşlərimizin dəstəyi altında doğma meydanda oynamağımızın bizə müsbət təsir göstərəcəyinə inanıram”.
Qeyd edək ki, B Liqasının B qrupunda yer alan U-17 millimiz martın 12-də Lüksemburq, 15-də Bolqarıstan, 18-də isə Malta yığması ilə qarşılaşacaq. Hər üç görüş “ASCO Arena”da keçiriləcək.
Bölmənin digər xəbərləri
