Azərbaycan Oslodakı dostluq festivalında təmsil olunub
Bakı, 12 oktyabr, AZƏRTAC
Norveç Azərbaycanlıları Gənclər Təşkilatı (NAYO) və Nizami Gəncəvi adına həftəsonu Azərbaycan məktəbi Oslo şəhərində keçirilən “Beynəlxalq Dostluq Günü” festivalında ölkəmizi təmsil edib.
Diasporla İş üzrə Dövlət Komitəsindən AZƏRTAC-a bildiriblər ki, festival Osloda yaşayan müxtəlif milli icmalar arasında dostluq münasibətləri yaratmaq, onların öz tarixlərini, mədəniyyətlərini və milli mətbəxlərini təbliğ və təmsil etmək, mənəvi dəyərlərini norveçlilərlə paylaşmaq məqsədilə təşkil olunub.
Azərbaycan guşəsinin ziyarətçilərini Nizami Gəncəvi adına həftəsonu Azərbaycan məktəbinin milli geyimli şagirdləri və NAYO-nun fəalları qarşılayıblar. Onlara ölkəmizin qədim tarixi, zəngin mədəniyyəti və milli mətbəxi barədə ətraflı məlumat verilib. Guşədə milli geyimlərimiz nümayiş etdirilib, müxtəlif dillərə tərcümə olunmuş kitablar, broşürlər, açıqcalar, DVD-lər və Azərbaycan mətbəxinin nümunələri təqdim edilib.
Festivalın səhnəsində çıxış edən həftəsonu məktəbinin şagirdləri Aida Ramberq, Ənvər Ramberq və Artan Amini Azərbaycan bəstəkarı Oqtay Zülfüqarovun “Gözəl Vətən” mahnısını ifa ediblər. Şagirdlərin çıxışı böyük maraqla qarşılanıb və onlar tamaşaçıların xahişi ilə ikinci dəfə səhnəyə çıxıblar. Festival təşkilatçıları məktəbliləri xüsusi hədiyyələrlə mükafatlandırıblar.
Bölmənin digər xəbərləri
