AZƏRBAYCAN PARLAMENTİNİN NÜMAYƏNDƏ HEYƏTİ BEYNƏLXALQ KONFRANSDA İŞTİRAK EDƏCƏKDİR

04.02.2006 [19:25]
Çap et
A⁺ A^-

AZƏRTAC xəbər verir ki, Azərbaycan Respublikası Milli Məclisi sədrinin birinci müavini, təhlükəsizlik və müdafiə məsələləri daimi komissiyasının sədri Ziyafət Əsgərovun başçılığı ilə parlament nümayəndə heyəti Corc Marşal Mərkəzi və Gürcüstan Parlamentinin birgə təşkil etdikləri “İslahatlar və əməkdaşlıq üzrə strategiyalar” mövzusunda keçiriləcək beynəlxalq konfransda iştirak etmək üçün fevralın 5-də Tbilisiyə gedəcəkdir.

Milli Məclisin mətbuat xidmətinin məlumatında deyilir ki, nümayəndə heyətinin tərkibinə deputatlardan Azər Əmiraslanov, Siyavuş Novruzov, Azay Quliyev, Elman Məmmədov, Aydın Həsənov, Nazim Məmmədov və Əhəd Əhmədov daxildirlər.

Cənubi Qafqaz və Baltikyanı ölkələrin parlamentarları üçün nəzərdə tutulmuş bu konfransda milli təhlükəsizlik siyasətində parlamentin iştirakı, silahlı qüvvələr üzərində nəzarət, demokratik islahatlar və digər mövzularda fikir mübadiləsi aparılacaqdır. Deputatlarımız müzakirə ediləcək məsələlərlə bağlı çıxış edəcək, qeyd və təkliflərini bildirəcəklər.

Səfər müddətində Milli Məclis sədrinin birinci müavini Ziyafət Əsgərovun Gürcüstan parlamentinin sədri Nino Burcanadze, xarici işlər nazirinin müavini və digər rəsmi şəxslərlə də görüşləri nəzərdə tutulmuşdur.

Parlament nümayəndə heyətinin səfəri fevralın 10-da başa çatacaqdır.