Azərbaycan Prezidenti Ermənistan baş nazirinin yalanlarını bir daha ifşa etdi
Bakı, 19 iyun, AZƏRTAC
Azərbaycan Şərq Tərəfdaşlığının fəal tərəfdaş ölkəsidir və Avropa İttifaqı ilə münasibətlər ölkəmizin xarici siyasətinin əsas prioritetlərindəndir. Azərbaycan Avropa İttifaqına üzv 9 dövlət ilə strateji tərəfdaşlıq haqqında sənəd imzalayıb. Hazırda konstruktiv əməkdaşlıq şəraitində Avropa İttifaqı ilə yeni tərəfdaşlıq sazişi üzərində iş gedir. Avropa İttifaqı Azərbaycanın əsas ticarət tərəfdaşıdır. Azərbaycanın ticarətinin təqribən 50 faizi Avropa İttifaqına üzv dövlətlərin payına düşür. Azərbaycan uzun müddətdir ki, Avropa bazarlarına xam neft nəql edən etibarlı təchizatçıdır. Dövlətimizin başçısı Şərq Tərəfdaşlığı ölkələrinin videokonfrans formatında Sammitində çıxışı zamanı qeyd etdi ki, yaxın zamanda Azərbaycan Avropa İttifaqının üzv dövlətlərini təbii qazla təchiz etməyə başlayaraq enerji təhlükəsizliyi və enerji ehtiyatlarının şaxələndirilməsini də təmin etmiş olacaq. Azərbaycan 3500 kilometrlik boru kəməri sistemi olan Cənub Qaz Dəhlizi tikintisinin təşəbbüskarı olmuş və bu layihənin maliyyələşdirilməsində iştirak etmişdir. Cənub Qaz Dəhlizi həm Azərbaycanı Avropa İttifaqı bazarına bağlayacaq, həm də Avropaya enerji mənbələrinin şaxələndirilməsi üçün geniş imkanlar yaradacaq.
Bu fikirləri AZƏRTAC-a açıqlamasında Yeni Azərbaycan Partiyası Səbail rayon təşkilatı sədrinin müavini, politoloq Mehman İsmayılov bildirib.
Mehman İsmayılov qeyd edib ki, dövlətimizin başçısı sammitdə Ermənistanın Azərbaycan ərazilərini işğal etməsi, həmin ərazilərdə qeyri-qanuni məskunlaşdırma siyasəti həyata keçirməsi məsələsinə də toxundu, BMT Təhlükəsizlik Şurasının məlum qətnamələrinin hələ də Ermənistan tərəfindən icra edilmədiyini diqqətə çatdırdı. Bildirdi ki, Ermənistan Azərbaycanın beynəlxalq səviyyədə tanınmış ərazisinin 20 faizini işğal altında saxlamaqda davam edir. Azərbaycanın Dağlıq Qarabağ bölgəsi və daha 7 rayonu 30 ilə yaxındır ki, Ermənistanın işğalı altındadır. Ermənistanın etnik təmizləmə siyasəti nəticəsində 1 milyondan artıq azərbaycanlı qaçqın və məcburi köçkünə çevrilib. BMT Təhlükəsizlik Şurasının 4 qətnaməsi Ermənistan qoşunlarının Azərbaycanın bütün işğal edilmiş ərazilərindən qeyd-şərtsiz və tam çıxarılmasını tələb edir. Ermənistan bu qətnamələrə, habelə ATƏT, Qoşulmama Hərəkatı, NATO, Avropa Parlamenti və digər beynəlxalq təşkilatlar tərəfindən qəbul edilmiş müvafiq sənədlərə əməl etmək əvəzinə işğal olunmuş ərazilərdə qeyri-qanuni məskunlaşma siyasəti həyata keçirir. Danışıqların mahiyyət və formatını məhv etməyə çalışan Ermənistanın baş nazirinin dediyinin əksi olaraq, Dağlıq Qarabağ Ermənistan deyil, Dağlıq Qarabağ Azərbaycandır və bütün dünya bunu belə tanıyır. Azərbaycanın ərazi bütövlüyü bərpa olunmalıdır. Bu xüsusda Prezident 2018-ci ildə Brüsseldə paraflanmış Azərbaycan-Aİ “Tərəfdaşlıq Prioritetləri” sənədinə toxunaraq dedi ki, sənəddə tərəflərin bir-birinin ərazi bütövlüyü, suverenliyi, müstəqilliyi və ölkələrin beynəlxalq sərhədlərinin toxunulmazlığının dəstəklənməsi öhdəliyi gələcək tərəfdaşlığın sütunlarından biri kimi təsbit edilib.
Sammit zamanı Ermənistanın baş naziri Nikol Paşinyan Azərbaycan Prezidentinin çıxışına isterik tərzdə reaksiya verdi. Paşinyan həm gülüş doğuran tərzdə ingilis dilində, həm də erməni dilində danışmağa başladı. Xüsusilə onun erməni dilində danışığı videokonfrans iştirakçılarında çaşqınlıq yaratdı və istehza ilə qarşılandı. Bir müddət sonra tərcüməçi Paşinyanın dadına çatdı. Baş nazir ingilis dilində “danışarkən” “Dağlıq Qarabağ münaqişəsi”, erməni dilində danışarkən isə “Artsax” ifadəsi işlətdi. Bu isə bir daha onu göstərir ki, Ermənistanda hələ də münaqişənin adının nə olduğunu bilmirlər. Prezident İlham Əliyevin çıxışına cavab verməyə çalışan Paşinyan Aşqabadda MDB Zirvə görüşündə və Münxen Təhlükəsizlik Konfransında olduğu kimi, özünü gülünc vəziyyətə qoydu. Paşinyan Avropa İnsan Haqları Məhkəməsinin Ramil Səfərovla bağlı işinə toxunaraq qərarın mahiyyətini saxtalaşdırdı və utanmadan iştirakçıları aldatmağa cəhd etdi. Açıq-aşkar yalançılıq etməklə Paşinyan özü-özünü ifşa etdi. Belə ki, onun dediklərinin əksinə olaraq, Avropa İnsan Hüquqları Məhkəməsi Azərbaycan dövlətini baş vermiş hadisədə müqəssir bilməyib. Azərbaycan Paşinyanın iddia etdiyi kimi guya irqçilikdə ittiham edilməyib və dövlət məsuliyyəti müəyyən olunmayıb. Bu hal fərdi əsasda baş vermiş davranış kimi qiymətləndirilib.
Prezident İlham Əliyev bir daha söz götürərək səlis və mükəmməl ingilis dilində faktlara əsaslanaraq N.Paşinyanın yalanlarını ifşa etdi. Paşinyanın videokonfransda həm Azərbaycan Prezidenti, həm də bütün iştirakçılar qarşısında aciz və gülməli duruma düşməsi bir daha onun küçə adamı olaraq qaldığını nümayiş etdirdi. O, bir daha göstərdi ki, mitinqlərdə çıxış etməklə bu səviyyəli konfranslarda çıxış etmək, dövlət idarəçiliyi tamamilə ayrı-ayrı şeylərdir.
N.Paşinyan çıxışında Aİ-nin koronavirusla bağlı Ermənistana 92 milyon avro həcmində yardım ayırmasını yüksək qiymətləndirdi. Bununla da Ermənistan bir daha xaricdən yardım diləndiyini nümayiş etdirdi. Prezident İlham Əliyev isə öz çıxışında bildirdi ki, Azərbaycan bu günə qədər 29 dövlətə humanitar yardım göstərib və pandemiya ilə mübarizə üçün Ümumdünya Səhiyyə Təşkilatına 10 milyon ABŞ dolları həcmində könüllü maliyyə yardımı ayırıb. Elə təkcə bu fakt Azərbaycanla Ermənistanın fərqini yaxşı izah edir. Azərbaycan Aİ ilə bərabərhüquqlu əməkdaşlıq edir. Ermənistan isə bu formatda əməkdaşlığa dilənçilik imkanı kimi baxır.
Daha bir məqama diqqəti cəlb edək. Videokonfransda Ermənistan baş nazirinin maska ilə oturması bir sıra suallar doğurur. Tək oturan Paşinyan özünü kimdən qoruyur? Paşinyan guya özünün koronavirusa yoluxmasını bildirməklə əslində erməni xalqını aldadıb. Məqsəd koronavirusa qarşı apardığı bərbad siyasəti malalamaq, erməni xalqının qəzəbini soyutmaqdır. Bu da onu göstərir ki, Paşinyan həmişə olduğu kimi, bu dəfə də səmimi deyil.
Bölmənin digər xəbərləri
