AZƏRBAYCAN PREZİDENTİ İLHAM ƏLİYEVİN BƏYANATI
-Hörmətli Emoməli Şərifoviç!
Hörmətli qonaqlar!
Prezident Emoməli Şərifoviç başda olmaqla qardaş Tacikistanın nümayəndə heyətini bir daha ürəkdən salamlamaq istəyirəm.
Bu gün biz qarşılıqlı maraq doğuran məsələlər barədə çox ətraflı fikir mübadiləsi apardıq. İqtisadi inteqrasiya çərçivəsində öz fəaliyyətimizi razılaşdırdıq, regional əməkdaşlıq, regional təhlükəsizlik məsələlərini, təbii ki, ikitərəfli münasibətləri, Ermənistan-Azərbaycan, Dağlıq Qarabağ münaqişəsinin həlli problemini müzakirə etdik. Böyük məmnunluqla deməliyəm ki, müzakirə etdiyimiz bütün məsələlər barədə bizim baxışlarımız və münasibətlərimiz üst-üstə düşür.
Ölkələrimiz arasında səmərəli, dinamik əməkdaşlıq mərhələsi başlanır. Xalqlarımız ta qədimdən bir-birinə böyük rəğbət bəsləmiş, bir-birinə can atmışlar. Bizdə ümumi cəhətlər, bizi birləşdirən cəhətlər çoxdur. Ölkələrimizin müstəqil dövlətlər kimi təşəkkül tapdığı illər ərzində həm Tacikistan, həm də Azərbaycan çox böyük tərəqqiyə nail olmuşdur. Biz müstəqilliyimizi möhkəmlətmişik, çox təsirli idarəetmə mexanizmi yaratmışıq, iqtisadi proseslərin inkişafına çox diqqət yetiririk. Əlbəttə biz belə hesab edirik ki, müştərək iqtisadi layihələrlə bir-birimizi gücləndirmək üçün böyük potensial vardır.
Bu gün biz ikitərəfli iqtisadi münasibətlərin inkişafına ciddi təkan verəcək bir neçə konkret layihəni müzakirə etdik. Ümidvaram ki, bu gün razılığa gəldiyimiz məsələlərin əməli nəticələrini ən yaxın vaxtda görəcəyik.
Bu il baharda mən Tacikistana ilk rəsmi səfər etdim, yayda isə Emoməli Şərifoviç Azərbaycana ilk rəsmi səfərə gəlib. Bu, bizim münasibətlərimizin dinamizmini əyani şəkildə nümayiş etdirir. Ümidvarıq ki, Tacikistanın və Azərbaycanın bütün strukturları iqtisadi inteqrasiya, qarşılıqlı əlaqələr istiqamətində səmərəli iş aparacaqlar ki, işimizin əməli nəticələrini mümkün qədər tezliklə görək.
Biz beynəlxalq təşkilatlarda da fəal əməkdaşlıq edirik, bütün məsələlərdə daim bir-birimizi dəstəkləyirik, bizim çox möhkəm siyasi münasibətlərimiz vardır. Bu gün bizim görüşümüzdə demişəm, bir daha demək istəyirəm ki, Tacikistanda Azərbaycanın səfirliyinin açılması barədə qərar bizim ikitərəfli əməkdaşlığa verdiyimiz əhəmiyyətin mühüm indikatorudur. Ümidvaram ki, yaxın vaxtlarda bizim səfirlik öz işinə başlayacaqdır.
Əminəm ki, yaradılması barədə bu gün razılığa gəldiyimiz birgə hökumətlərarası komissiya iqtisadi inteqrasiyanın yeni prioritetlərini müəyyən etmək üçün yaxşı bir forma olacaqdır. Ölkələrimizin iqtisadiyyatı dinamik inkişaf edir, potensial artır, müştərək nəqliyyat infrastrukturundan istifadə edilməsi imkanları çox ümidvericidir. Buna görə də komissiya iqtisadi əməkdaşlığın praktiki aspektləri üzərində, konkret layihələr üzərində işləməli, hər iki dövlətin biznes strukturları üçün əlverişli şərait yaratmalıdır.
Biz qəti əminik ki, razılığa gəldiyimiz bütün məsələlər həyata keçiriləcəkdir. İqtisadi inteqrasiya, ölkələrimiz arasında qarşılıqlı siyasi əlaqələr, qlobal təhlükələrə - terrorizmə, narkotrafikə qarşı birgə mübarizə, regionda təhlükəsizlik sisteminin möhkəmləndirilməsi - bütün bunlar müasir həyatın elə aspektləridir ki, orada həm Tacikistan, həm də Azərbaycan mühüm rol oynayır və bizim regionda sülhün möhkəmlənməsinə, təhlükənin azalmasına layiqli töhfə verirlər.
Mən çox şadam ki, bu gün Emoməli Şərifoviç bizim ölkəmizə təşrif gətirmişdir. Bu, onun Azərbaycana ilk səfəridir. Biz hər ikimiz bu ünsiyyəti eyni dərəcədə səmərəli şəkildə davam etdirmək arzusundayıq. Biz beynəlxalq forumlarda tez-tez görüşmüşük və görüşürük, ikitərəfli səfərlər - ikitərəfli münasibətlərin ən mühüm elementidir. Biz bu sıx əməkdaşlığı davam etdirəcəyik, xüsusən ona görə ki, bizim aramızda çox yaxın və etimadlı dostluq münasibətləri yaranmışdır.
Mən bu səfərin həyata keçirilməsi faktının özündən də, səfərin necə keçməsindən, məsələləri necə operativ həll etməyimizdən də məmnun olduğumu bildirmək istəyirəm. Emoməli Şərifoviçi bizim ölkədə salamlamaq bir insan kimi mənə çox xoşdur.
Diqqətinizə görə təşəkkür edirəm.
Bölmənin digər xəbərləri
