AZƏRBAYCAN PREZİDENTİ İLHAM ƏLİYEVİN BƏYANATI
-Hörmətli cənab Prezident!
Hörmətli qonaqlar!
Mən sizi Azərbaycanda bir daha ürəkdən salamlayıram, xoş gəlmisiniz!
Bu gün İran İslam Respublikasının Prezidenti cənab Mahmud Əhmədinejad Azərbaycana ilk rəsmi səfərini edir. Bundan əvvəl hörmətli Prezident Azərbaycanda işgüzar səfərlərdə olmuşdur. Amma ilk rəsmi səfər əlbəttə ki, xüsusi əhəmiyyət daşıyır. Biz bu səfərə çox böyük əhəmiyyət veririk. Mən əminəm ki, səfər və onun nəticələri iki dost və qardaş ölkənin gələcək birgə fəaliyyətində çox böyük rol oynayacaqdır. Bizim aramızda münasibətlər çox yüksək səviyyədədir, çox səmimidir.
Biz bu gün söhbət əsnasında həm təkbətək görüşdə, eyni zamanda nümayəndə heyətlərinin iştirakı ilə görüşdə çox geniş fikir mübadiləsi aparmışıq. İkitərəfli münasibətlər təhlil olundu, biz birgə layihələrimiz haqqında söhbət apardıq. Bölgədə vəziyyət, regional əməkdaşlıq məsələləri, bölgədə təhlükəsizlik tədbirlərinin güclənməsi məsələləri geniş müzakirə olundu.
Bu müzakirələr və aparılan danışıqlar bir daha göstərir ki, bizim ölkələrimiz bir-birinə çox yaxındır. Biz çox səmərəli əməkdaşlıq edirik və bu günə qədər aramızda imzalanmış bütün sənədlər həyatda öz əksini tapır. Bu da çox vacibdir ki, imzalanmış sənədlər kağız üzərində qalmır, onlar həyatda öz əksini tapır, reallığa çevrilir. Bu onu göstərir ki, doğrudan da qarşılıqlı ticarətin inkişafı, qarşılıqlı əlaqələrin möhkəmlənməsi üçün çox böyük imkanlar və qarşılıqlı maraq var.
Bu gün isə imzalanmış sənədlər bizim müştərək inkişafımızın yeni mərhələsini müəyyən edəcəkdir. Konkret layihələr icra olunacaqdır. Bununla bərabər, prezidentlər tərəfindən imzalanmış Birgə Bəyanat çox geniş və müfəssəl bir sənəddir. Orada ikitərəfli münasibətləri ehtiva edən bütün prinsiplər öz həllini tapmışdır və əminəm ki, gələcək əməkdaşlıq üçün çox böyük zəmin olacaqdır.
Xüsusilə demək istəyirəm ki, Birgə Bəyanatda Ermənistan-Azərbaycan, Dağlıq Qarabağ məsələsinə dair bənd mövcuddur və İran İslam Respublikası Azərbaycanın mövqeyini birmənalı şəkildə bir daha dəstəklədi, münaqişənin beynəlxalq hüquq normaları əsasında həll olunmasının vacibliyi və Azərbaycanın ərazi bütövlüyü çərçivəsində həll olunması vurğulandı.
Azərbaycan dövlət müstəqilliyini bərpa etdikdən sonra ilk günlərdən Ermənistan-Azərbaycan, Dağlıq Qarabağ münaqişəsinə dair İranın mövqeyi birmənalı olubdur və biz bu dəstəyi daim hiss etmişik, bu gün də bunu hiss edirik. Şübhəsiz ki, məsələnin həlli üçün bu mövqe xüsusi rola malikdir.
Bütün başqa sahələrdə qarşılıqlı maraqların təmin olunması üçün lazımi tədbirlər görülür. Biz beynəlxalq təşkilatlarda çox səmərəli fəaliyyət göstəririk, istər Birləşmiş Millətlər Təşkilatı, istər İslam Konfransı Təşkilatı və digər təşkilatlarda bir-birimizi dəstəkləyirik. Eyni zamanda, regional məsələlərdə çox fəal iştirak edirik. Energetika, nəqliyyat, humanitar sahələrdə - bütün bu sahələrdə bizim əməkdaşlığımız çox uğurludur və bizi qane edir. Şübhə etmirəm ki, hörmətli cənab Prezidentin Azərbaycana rəsmi səfərindən sonra bu münasibətlər yeni pilləyə qalxacaq, bizim aramızda çox dərin tarixi köklərə əsaslanan münasibətlər daha da inkişaf edəcəkdir.
Mən hesab edirəm ki, həm ikitərəfli münasibətlərin inkişafı üçün, həm də regional əməkdaşlığın inkişafı üçün bu səfərin çox böyük əhəmiyyəti var.
İstəyirəm, cənab Prezidenti və ölkəmizə gəlmiş İran nümayəndə heyətini Azərbaycanda bir daha salamlayım, “Xoş gəlmisiniz” deyim və sizə fəaliyyətinizdə uğurlar diləyim.
Təşəkkür edirəm.
Bölmənin digər xəbərləri
