RƏSMİ XRONİKA
AZƏRBAYCAN PREZİDENTİ İLHAM ƏLİYEVİN VƏ FRANSA PREZİDENTİ JAK ŞİRAKIN TƏKBƏTƏK GÖRÜŞÜ
AZƏRTAC-ın xüsusi müxbirləri xəbər verirlər ki, yanvarın 29-da Yelisey sarayında Azərbaycan Respublikasının Prezidenti İlham Əliyev və Fransa Respublikasının Prezidenti Jak Şirak arasında təkbətək görüş keçirilmişdir.
Prezident Jak Şirak dövlətimizin başçısına müraciətlə dedi ki, mən çox məmnunam ki, Azərbaycan Prezidenti Fransaya dövlət səfəri edir. Son zamanlar Azərbaycanla Fransa arasındakı əməkdaşlıq çox inkişaf edib və bu il Fransada Azərbaycan İli keçiriləcəkdir. Hesab edirəm ki, münasibətlərimiz həm siyasi, həm də iqtisadi baxımdan çox vacib və səmərəlidir.
Prezident İlham Əliyev təşəkkür edərək dedi ki, Fransaya dövlət səfəri etmək mənim üçün çox şərəflidir. Prezident seçildikdən sonra mənim ilk rəsmi səfərim də Fransaya olmuşdur.
Dövlət başçıları enerji layihələri, Cənubi Qafqazda vəziyyət və Dağlıq Qarabağ münaqişəsi ilə bağlı fikir mübadiləsi apardılar.
Prezident İlham Əliyev Bakı-Tbilisi-Ceyhan və Bakı-Tbilisi-Ərzurum layihələri haqqında danışaraq, onların əhəmiyyətini vurğuladı, ötən ilin noyabrında Brüsselə səfəri zamanı Azərbaycan ilə Avropa İttifaqı arasında enerji məsələləri üzrə strateji tərəfdaşlığa dair anlaşma memorandumunun imzalandığını xatırlatdı. Dövlətimizin başçısı bildirdi ki, beləliklə, Azərbaycan Xəzər regionundan Avropa bazarlarına neft və qaz ixrac edən ilk ölkə olacaqdır. Bu da Azərbaycan dövlətinin seçimidir.
Regionda gedən proseslərin müzakirəsi zamanı Prezident Jak Şirak öz ölkəsinin mövqeyini ifadə edərək dedi ki, biz çox istərdik, Azərbaycanın yerləşdiyi regionda sülh və sabitlik şəraiti olsun.
Prezidentlər görüşdə Dağlıq Qarabağ münaqişəsinin həlli ilə bağlı danışıqların son vəziyyətini də müzakirə etdilər.
Prezident İlham Əliyev həmsədrlərin regiona axırıncı səfəri barədə danışaraq, keçirilən görüşlərin faydalı olduğunu söylədi. Dövlətimizin başçısı Azərbaycan və Ermənistan prezidentlərinin son görüşünün Minskdə keçirildiyini bildirərək dedi ki, Ermənistan öz təcavüzkar siyasətinə son qoymalıdır və bundan sonra Cənubi Qafqaz regionunda sabitlik təmin edilə və daha çox inkişaf əldə oluna bilər.
Prezident Jak Şirak vurğuladı ki, Minsk qrupunun həmsədri kimi Fransa regiona sülhün daha tez bir zamanda gəlməsi, qaçqın və məcburi köçkünlərin öz doğma yurd-yuvalarına qayıtması üçün bütün nüfuzundan və imkanlarından istifadə edəcəkdir.