AZƏRTAC-ın xüsusi müxbiri xəbər verir ki, Azərbaycan Respublikasının Prezidenti İlham Əliyev yanvarın 26-da Davosda İsveçrə Konfederasiyasının Prezidenti xanım Mişelin Kalmi-Rey ilə görüşmüşdür.

Görüşdə ölkələrimiz arasında ikitərəfli münasibətlərin inkişafı ilə bağlı fikir mübadiləsi aparıldı və gələcəkdə əməkdaşlığın daha da genişləndirilməsi, eləcə də İsveçrə şirkətlərinin Azərbaycana sərmayə qoyması barədə söhbət getdi.

İsveçrənin Prezidenti Ermənistan-Azərbaycan, Dağlıq Qarabağ münaqişəsinin həlli ilə də maraqlandı. Prezident İlham Əliyev münaqişə və aparılan danışıqlar prosesi barədə məlumat verdi.

Prezident Mişelin Kalmi-Rey Azərbaycanın Avropanın enerji təhlükəsizliyində mühüm rol oynadığını xüsusi vurğuladı və dedi ki, bu, Azərbaycanı çox vacib ölkəyə çeviribdir.

Prezident İlham Əliyev Azərbaycandakı proseslərdən danışdı, ölkəmizdə qeyri-neft sektoruna sərmayə qoyulması üçün geniş imkanların olduğunu bildirdi.

Görüşdə qarşılıqlı maraq doğuran digər məsələlər haqqında da geniş fikir mübadiləsi aparıldı.

X X X

Azərbaycan Prezidenti İlham Əliyevin İsveçrəyə səfəri başa çatmışdır.