RƏSMİ XRONİKA
AZƏRBAYCAN PREZİDENTİ İLHAM ƏLİYEVİN VƏ RUSİYA PREZİDENTİ VLADİMİR PUTİNİN GÖRÜŞÜ
AZƏRTAC-ın xüsusi müxbiri xəbər verir ki, iyunun 30-da, Rostov ippodromunda cıdır başa çatdıqdan sonra Azərbaycan Respublikasının Prezidenti İlham Əliyevin və Rusiya Federasiyasının Prezidenti Vladimir Putinin görüşü olmuşdur.
Rusiyanın dövlət başçısı onun dəvətini qəbul edib Rostova gəldiyinə görə Azərbaycan Prezidentinə təşəkkürünü bildirərək dedi ki, qarşılıqlı maraq doğuran məsələləri, o cümlədən ikitərəfli münasibətləri, bütün region üçün çox həssas olan bəzi beynəlxalq problemləri müzakirə etmək imkanının yaranmasına şaddır.
Prezident İlham Əliyev dəvətə görə təşəkkür edərək dedi:
- Mən buraya böyük məmnuniyyətlə gəldim, bir neçə saat birlikdə olduq və söhbət etmək imkanımız oldu, maraqlı yarışları izlədik. Əlbəttə ki, bu, görüşmək, çox dinamik və səmərəli şəkildə inkişaf edən ikitərəfli əlaqələrimizə, habelə regional məsələlərə dair fikir mübadiləsi aparmaq üçün yaxşı imkandır. Bu məsələlərə yanaşmamız, bu məsələlər barədə mövqeyimiz eynidir. Biz münasibətlərimizi strateji tərəfdaşlıq kimi səciyyələndiririk və bu tərəfdaşlığa sadiqik. Rusiyaya həmişə məmnuniyyətlə gəlirəm, mən əvvəllər Rostovda heç vaxt olmamışdım, şəhərə tamaşa etmək, Rusiyanın bu hissəsini də görmək çox maraqlı idi.
Rusiya Prezidenti vurğuladı ki, biz Azərbaycanda iqtisadi artımın sürətinin təsiri altındayıq, neçə ildir ki, artım 34-35 faizdir, bu, sadəcə, heyrətləndiricidir. Prezident Putin bildirdi ki, Azərbaycanda da zəngin olan enerji daşıyıcılarının qiymətinin qalxması haqqında nə istəsən danışmaq olar, lakin hər halda, bu artımın səbəbi başqadır, şübhəsiz ki, bu, ölkə hökumətinin apardığı düşünülmüş iqtisadi siyasətdir.
Azərbaycan Prezidenti bu fikrə şərik çıxaraq vurğuladı ki, bu, həqiqətən belədir. Son üç il ərzində iqtisadiyyatımızın artımı 96 faiz olmuşdur. Əlbəttə, bunda həm neft, həm də qeyri-neft amilləri rol oynayır.
Prezident İlham Əliyev Azərbaycan ilə Rusiya arasında qarşılıqlı iqtisadi əlaqələrdən danışarkən əmtəə dövriyyəsinin artmasını vurğulayaraq dedi:
- Son üç il ərzində biz bunu, əslində, üçqat artırmışıq, bu, ölkələrimizin potensialını, habelə münasibətlərimizin yaxınlığını göstərir. Çünki, adətən, biznes yaxşı siyasi bazanın olduğu yerdə səmərəli əməkdaşlıq qurur, ölkələrimiz arasında isə bu var. Biz münasibətlərimizin bütün istiqamətlərdə möhkəmlənəcəyinə ümid edirik.