Azərbaycan qışlayan quşların sayına görə Avropada ön sıradadır
Bakı, 3 mart, AZƏRTAC
Bu gün Ümumdünya Vəhşi Təbiət Günüdür. Bu günün məqsədi ictimaiyyəti vəhşi fauna və yabanı flora növlərinin müxtəlifliyi barədə məlumatlandırmaq və insanlara vəhşi təbiətin mühafizəsini aşılamaqdır.
Hazırda Azərbaycanda təbiətin mühafizəsi istiqamətində hansı layihələr reallaşdırılır və mövcud vəziyyət necədir? Bu barədə AZƏRTAC-a məxsusi müsahibəsində Azərbaycan Ornitoloji Cəmiyyətinin direktoru, biologiya üzrə fəlsəfə doktoru Elçin Sultanov məlumat verib.
Biologiya üzrə fəlsəfə doktoru qeyd edib ki, bu il Azərbaycanda quşların sayı aparılıb. Müəyyən edilib ki, ölkəmizdə qışlayan quşların sayı 800 mindən çoxdur. Reallıqda isə bu rəqəm 1 milyonu ötür. Qışın isti keçməsinə baxmayaraq, bu say kifayət qədərdir.
“Azərbaycan Avropada qışlayan quşların sayına görə 3-4-cü yerdədir. Hollandiya və İngiltərədən sonra Azərbaycan Türkiyə ilə növbəti pillələrdə qərarlaşıb. Bu da Kür-Araz ovalığı, Xəzər sahilində unikal yerlərin olması, orada çoxlu sututarları, küləkdən qorunan buxtaların mövcudluğu və onların sualtı bitkilərlə zənginliyi ilə əlaqədardır.
Quşların sayının aparılması zamanı ölkədə bu il 110 min bəzgək qeydə alınıb, lakin onların real sayı 150-200 min arasındadır. Ən çox qışlayan quş Qızılağac Milli Parkında qeydə alınıb. Belə ki, həmin milli parkda 200 mindən çox quş qışlayıb. Bu il Abşeron Milli Parkında isə 160 min quşun qışlaması müşahidə edilib. Adətən Abşeron Milli Parkında 30 mindən çox quşun qışlaması ilə rastlaşmırdıq. Son 30 ildə birinci dəfədir ki, bu milli parkda bu qədər quşun qışlamasının şahidi olduq. Bundan əlavə, Ağgöldə 70, Ələt buxtasında 60, Pirallahı adasında 50, Sarısu gölündə 55, Mahmudçalada 20 min quş qışlayıb”, - deyə E.Sultanov qeyd edib.
Bölmənin digər xəbərləri
