Azərbaycan qrossmeysteri FİDE-nin reytinq siyahısında ən yaxşı on şahmatçı sırasına qayıtmışdır
Bakı, 2 noyabr (AZƏRTAC). AZƏRTAC FİDE-nin saytına istinadla xəbər verir ki, Azərbaycan qrossmeysteri Şəhriyar Məmmədyarov Beynəlxalq Şahmat Federasiyasının yenilənmiş reytinq siyahısında 11-ci yerdən 10-cu yerə yüksəlmişdir.
Reytinq siyahısına əvvəlki kimi norveçli Maqnus Karlsen başçılıq edir. Onun aktivində 2870 bal var. Bu yaxınlarda Avropa Klubları Kuboku yarışlarının qızıl medalını qazanmış Ş.Məmmədyarovun hesabında 2757 bal vardır. Yüz ən yaxşı oyunçu arasında Azərbaycanı Teymur Rəcəbov (2715, 33-34-cü yerlər) və Eltac Səfərli (2653, 99-cu yer) təmsil edirlər.
Hazırkı dünya çempionu Vişvanatan Anand 2775 balla yeddinci yerdədir. O, öz titulunu saxlamaq üçün bu ilin noyabrında Karlsenlə görüşməlidir. Şahmat tacı uğrunda matç V.Anandın doğma şəhəri Çennaidə keçiriləcəkdir.
Bölmənin digər xəbərləri
